Anal nahiyədə müşahidə olunan ağrı və qanaxma hər zaman babasil göstəricisi olmaya bilər.

Aztibb.az xəbər verir ki, ümumi cərrah, cərrah-proktoloq və endoskopist tibb üzrə fəlsəfə doktoru Anar Əliyevin sözlərinə görə, bu kimi şikayətlər anal çat zamanı da müşahidə oluna bilər və düzgün diaqnozun qoyulması uğurlu müalicənin əsas şərtidir.

Babasil (hemoroid) zamanı anal nahiyədə şişkinlik və düyünlər yaranır, qanaxma adətən ağrısız olur, eyni zamanda bölğədə qaşınma və narahatlıq hissi müşahidə edilir. Anal çat zamanı isə defekasiya anında kəskin, bıçaqvari ağrı baş verir, bu ağrı defekasiyadan sonra da davam edir və proses zamanı az miqdarda parlaq qırmızı qan görünür.

Bu iki xəstəlik oxşar əlamətlər versə də, tətbiq edilən müalicə üsulları tamamilə fərqlidir. Özbaşına dərman istifadəsi problemi daha da uzada və xəstəliyin gedişini ağırlaşdıra bilər. Buna görə də şikayətləriniz davam edərsə, vaxt itirmədən mütləq cərrah-proktoloq müayinəsindən keçməyiniz tövsiyə olunur.