Uşaq kardioloqu, professor Yılmaz Yozgat bildirib ki, uşaqlıq dövründə tez-tez rast gəlinən boğaz infeksiyaları vaxtında müalicə olunmadıqda illər sonra ciddi ürək xəstəliklərinə səbəb ola bilər.

Aztibb.az "Haber Türk"ə istinadən yazır ki, professorun sözlərinə görə, sadə boğaz ağrısı kimi qiymətləndirilən bəzi infeksiyalar uşaqlarda ürək qapaqlarına qədər uzanan ağır fəsadlar yarada bilər.

Həkim qeyd edib ki, A qrupu beta-hemolitik streptokok bakteriyasının törətdiyi infeksiyalardan sonra inkişaf edən kəskin revmatik qızdırma erkən aşkar edilmədikdə ürək qapaqlarında daimi zədələnmələrə səbəb ola bilər.

"Uşaqlar, xüsusilə məktəb yaşlarında bu mikrobu bir-birlərindən hava-damcı yolu ilə yoluxdururlar. Bakteriya boğazda yerləşdikdə yüksək hərarətlə müşayiət olunan boğaz infeksiyası yaradır və bu mərhələdə düzgün antibiotik müalicəsi böyük əhəmiyyət daşıyır", – deyə professor bildirib.

Onun sözlərinə görə, xəstəlik əvvəlcə oynaq ağrıları ilə özünü göstərə bilər. Bəzi uşaqlarda boğaz infeksiyasından 2–3 həftə sonra diz və topuq oynaqlarında ağrı və şişkinlik yaranır. Eyni zamanda bəzi hallarda ürək qapaqları da zədələnə bilər. Oynaq problemləri adətən iz qoymadan sağalsa da, ürək qapaqlarında yaranan zədələnmə qalıcı olur. Təkrarlanan hər beta infeksiyası ürək qapaqlarının vəziyyətini daha da ağırlaşdırır və nəticədə 20–30 yaşlarında ürək qapağı əməliyyatına ehtiyac yarana bilər.

Erkən müalicə qalıcı zədələnmənin qarşısını ala bilər

Professor Yozgat bildirib ki, xəstəlik bəzən yalnız illər sonra ürəkdə küy aşkar edildikdə müəyyən edilir. Exokardioqrafiya zamanı ürək qapağında çatışmazlıq aşkar edilərsə, bunun keçmişdə lazımi şəkildə müalicə olunmamış boğaz infeksiyası ilə əlaqəli olduğu müəyyən edilə bilər.

"Xəstəlik erkən mərhələdə aşkar edilərək müalicə olunarsa, ürək qapaqlarında qalıcı zədələnmənin qarşısını almaq mümkündür", – deyə o vurğulayıb.

Valideynlər oynaq ağrılarına diqqət yetirməlidirlər

Mütəxəssis qeyd edib ki, valideynlər uşaqlarda oynaq ağrılarını çox vaxt böyümə ağrıları kimi qiymətləndirirlər. Halbuki bu əlamət kəskin revmatik qızdırmanın ilk göstəricilərindən biri ola bilər.

Professorun sözlərinə görə, ürək qapağı çatışmazlığı aşkarlanan uşaqlarda yeni beta infeksiyalarının ürəyə əlavə zərər verməsinin qarşısını almaq üçün uzun illər ərzində hər 21 gündən bir profilaktik antibiotik inyeksiyası tələb oluna bilər.

Mütəxəssis xüsusilə 3 yaşdan yuxarı uşaqların uşaq kardioloqu tərəfindən müayinədən keçməsini və lazım gəldikdə exokardioqrafik müayinə aparılmasını tövsiyə edib.