Meşə yanğınları zamanı yaranan sıx tüstü təkcə təbiətə deyil, insan sağlamlığına da ciddi təhlükə yaradır. Döş qəfəsi xəstəlikləri üzrə mütəxəssis Berivan Usta bildirib ki, tüstünün tərkibində mikroskopik hissəciklər, karbonmonoksit, ağır metallar və digər zərərli maddələr olur. Bu hissəciklər ağciyərlərin dərin qatlarına qədər daxil olaraq qan dövranına keçə bilər.

Aztibb.az "Haber Türk"ə istinadən yazır ki, onun sözlərinə görə, sağlam insanlarda belə baş ağrısı, göz yanması və boğaz qıcıqlanması yarana bilər. Astma, Xroniki Obstruktiv Ağciyər Xəstəliyi (XOAX), bronxit və digər xroniki ağciyər xəstəlikləri olan şəxslər, həmçinin uşaqlar, yaşlılar və allergiyaya meyilli insanlar üçün isə tüstü həyati təhlükə yarada bilər.

Mütəxəssis tüstünün təsirindən qorunmaq üçün zərurət olmadıqca çölə çıxmamağı, qapı və pəncərələri bağlı saxlamağı, HEPA filtrli hava təmizləyicilərindən istifadə etməyi və məcburi hallarda N95, FFP2 və ya FFP3 tipli qoruyucu maskalar taxmağı tövsiyə edir.

Xroniki tənəffüs xəstəlikləri olan şəxslər təyin olunmuş dərmanlarını müntəzəm qəbul etməli, nəfəs darlığı, güclü öskürək və sinə ağrısı kimi əlamətlər yarandıqda isə dərhal həkimə müraciət etməlidirlər. Bundan əlavə, bol maye qəbul etmək və rəsmi hava keyfiyyəti xəbərdarlıqlarını izləmək də vacib hesab olunur.