Böyük Britaniyada aparılan araşdırma göstərib ki, həyatın ilk iki ilində şəkər qəbulunun məhdudlaşdırılması gələcək illərdə beyin sağlamlığının qorunmasına kömək edə bilər.

Aztibb.az "Neurology" jurnalında dərc olunan araşdırmanın nəticələrinə diqqət çəkib

Honq-Konq Elm və Texnologiya Universitetinin alimləri tədqiqat çərçivəsində Böyük Britaniyanın “Biobank” layihəsində qeydiyyatdan keçmiş təxminən 65 min insanın məlumatlarını təhlil ediblər.

Araşdırmada Böyük Britaniyada şəkərə tətbiq olunan məhdudiyyətlərin aradan qaldırılmasından sonra insanların qidalanma vərdişlərində şəkər miqdarının sürətlə artmasının mümkün təsirləri araşdırılıb.

Nəticələr göstərib ki, həyatının ilk iki ilində şəkər məhdudiyyəti dövründə böyüyən insanlarda demensiya (unutqanlıq və idrak qabiliyyətlərinin zəifləməsi) hallarının 23 faiz daha az olduğu və xəstəliyin orta hesabla təxminən iki il yarım daha gec diaqnoz edildiyi müşahidə olunub.

Tədqiqatçı Jiazhen Zheng bildirib: “Əldə etdiyimiz nəticələr göstərir ki, həyatın ən erkən dövrlərində şəkər qəbulunun məhdudlaşdırılması beyin sağlamlığı üçün uzunmüddətli faydalar təmin edə bilər”.