Yay açıq su hövzələri və küçə yeməkləri mövsümüdür, bununla yanaşı seroz meningit xəstəliyinin də yayıldığı dövrdür. Sanitar həkimlər xəstəliyi necə tanımağı və həm özünü, həm də uşaqları bu infeksiyadan necə qorumağı xatırladır.

Aztibb.az "Petropavlovsk.news"a istinadən yazır ki, seroz meningit baş və onurğa beyninin qişalarının iltihabıdır. Ən çox bu xəstəliyə viruslar, o cümlədən enteroviruslar səbəb olur. İnfeksiyaya hava-damcı yolu ilə, çirkli əllər və yoluxmuş əşyalar vasitəsilə, çirkli qida və su ilə, eləcə də təhlükəsiz olmayan su hövzələrində çimərkən yoluxmaq mümkündür. Bu amillər yay aylarında xüsusilə aktualdır.

Əsas təhlükəli əlamətlər yüksək hərarət, güclü baş ağrısı, ürəkbulanma və qusma, halsızlıq, işıqdan qorxma, həmçinin boyun əzələlərinin gərginləşməsi və başı sinəyə əyməyin çətinləşməsidir. Bu əlamətlər, xüsusilə uşaqda müşahidə olunarsa, vaxt itirmədən həkimə müraciət etmək lazımdır.

Əlləri mütəmadi və düzgün yumaq, yalnız keyfiyyətli su içmək, meyvə-tərəvəzi yaxşı yumaq, qidaların saxlanma qaydalarına əməl etmək vacibdir. Virus infeksiyası əlamətləri olan insanlarla təmasdan çəkinmək, evi tez-tez havalandırmaq və nəm təmizlik aparmaq tövsiyə olunur.

Çimmək üçün yalnız yoxlanılmış və icazə verilmiş yerlərə üstünlük vermək lazımdır. Qarşıya çıxan istənilən su hövzəsinə girmək məsləhət deyil. Çimərkən suyu udmamaq vacibdir. Bu qaydanı uşaqlara xüsusilə tez-tez xatırlatmaq lazımdır, çünki yay aylarında onların istənilən yerdə çimmək istəyi daha da artır.