Uzun illər ərzində, hətta tibb mütəxəssisləri arasında belə, gündə 1-2 qədəh alkoqolun, xüsusilə qırmızı şərabın ürək sağlamlığı üçün faydalı ola biləcəyi fikri geniş yayılmışdı. Lakin son illərdə aparılan daha etibarlı və genişmiqyaslı elmi tədqiqatlar bu qənaətin doğru olmadığını ortaya qoyur.

Aztibb.az xəbər verir ki, endokrinoloq Fərhad Burzunun bildiridiyinə görə, müasir araşdırmalar göstərir ki, gündə cəmi bir porsiya alkoqol qəbulu belə bəzi xərçəng növləri, ürək-damar xəstəlikləri və qaraciyər patologiyalarının riskinin artması ilə əlaqələndirilir. Bununla yanaşı, az miqdarda alkoqol qəbulunun sağlam insanlar üçün hər hansı əhəmiyyətli qoruyucu təsiri elmi şəkildə təsdiqlənməyib.

Ekspert qeyd edir ki, əvvəlki tədqiqatlarda müəyyən metodoloji çatışmazlıqlar da mövcud idi. Belə ki, alkoqol qəbul etməyənlər qrupuna yalnız heç vaxt spirtli içki istifadə etməmiş insanlar deyil, sağlamlıq problemlərinə görə sonradan alkoqoldan imtina edən şəxslər də daxil edilirdi. Bu isə nəticələrin obyektivliyinə təsir göstərirdi.

Digər tərəfdən, az miqdarda alkoqol qəbul edən insanların əksəriyyəti daha sağlam qidalanır, fiziki cəhətdən daha aktiv olur və ümumilikdə daha sağlam həyat tərzi sürürdülər. Buna görə də onların sağlamlıq göstəricilərini yalnız alkoqol qəbulu ilə əlaqələndirmək elmi baxımdan düzgün yanaşma hesab edilmir.

"Bu gün mövcud elmi dəlillər göstərir ki, sağlamlıq baxımından ən təhlükəsiz alkoqol miqdarı heç qəbul edilməməsidir. Məhz buna görə də "qırmızı şərab ürək üçün faydalıdır" kimi uzun illər qəbul olunmuş fikirlər artıq müasir elmi sübutlarla dəstəklənmir", - deyə həkim bildirib.

Mütəxəssislər vurğulayıb ki, alkoqolun guya sağlamlığa faydalı olduğu düşüncəsi sağlam həyat tərzi qaydalarına əməl etməmək üçün əsas ola bilməz. Ürək-damar sağlamlığını qorumağın ən etibarlı yolu balanslı qidalanmaq, müntəzəm fiziki aktivliklə məşğul olmaq, siqaret çəkməmək, normal bədən çəkisini saxlamaq və həkim tövsiyələrinə əməl etməkdir.