Avstraliya Terapevtik Məhsullar İdarəsi (TGA) tip 2 diabet və piylənmənin müalicəsində istifadə olunan GLP-1 reseptor aqonisti preparatlarının nadir, lakin ciddi göz xəstəliyi riskini artıra biləcəyi barədə xəbərdarlıq yayıb.

Aztibb.az xəbər verir ki, qurumun açıqlamasına görə, sözügedən preparatlar qeyri-arteritik ön işemik optik neyropatiya (NAION) adlanan nadir xəstəliyin yaranması ilə əlaqəli ola bilər.

Xəbərdarlıqda qeyd olunub ki, NAION daimi görmə pozğunluğuna, o cümlədən korluğa səbəb ola bilər. Hazırda bu xəstəlik nəticəsində yaranan görmə itkisini bərpa edən təsdiqlənmiş müalicə üsulu mövcud deyil.

TGA vurğulayıb ki, GLP-1 preparatlarından istifadə edən şəxslərdə qəfil görmə zəifləməsi və ya görmə itkisi baş verərsə, dərmanın qəbulu dərhal dayandırılmalı və təcili olaraq tibb müəssisəsinə müraciət edilməlidir.

Avstraliya Terapevtik Məhsullar İdarəsinin məlumatına görə, bu günədək GLP-1 preparatlarının istifadəsi ilə əlaqələndirilən 36 NAION hadisəsi qeydə alınıb.

NAION gözün arxa hissəsində yerləşən görmə sinirinə qan axınının pozulması nəticəsində yaranır. Xəstəlik adətən yuxudan oyandıqdan sonra qəfil, ağrısız görmə itkisi ilə özünü göstərir və əksər hallarda yaranan zədələnmə geri dönməz olur.

GLP-1 reseptor aqonistləri orqanizmdə qan şəkərinin səviyyəsini və iştahı tənzimləyən təbii hormonun təsirini təqlid edir. Bu preparatlar əsasən tip 2 diabetin müalicəsində, eyni zamanda piylənmənin və artıq çəkinin idarə olunmasında geniş istifadə olunur.