Dövlət Gömrük Komitəsi Tibbi Xidmət İdarəsinin Elmi-Təcrübi Tədris Mərkəzinin rəisi, tibb elmləri doktoru, ürək-damar cərrahı Rəşad Mahmudov növbəti uğurlu əməliyyat nəticəsini və balaca xəstəsinin sevincini ictimaiyyətlə bölüşüb.

Aztibb.az xəbər verir ki, həkimin sözlərinə görə. təxminən üç ay əvvəl anadangəlmə ürək qüsurundan əziyyət çəkən Zəhra adlı azyaşlı pasiyent cərrah Rəşad Mahmudov tərəfindən uğurla əməliyyat olunub. Əməliyyat mürəkkəb döş sümüyü kəsiyi edilmədən, qabırğalararası kiçik kəsiklə – minimal invaziv üsulla həyata keçirilib.

Bu gün keçirilən nəzarət müayinəsinin nəticələrinə əsasən, azyaşlının səhhətinin tam qaydasında olduğu müəyyən edilib.

Təcrübəli cərrah öz təəssüratlarını belə ifadə edib:

 

"Bu gözəl qız məndən bu gün birlikdə çəkdirdiyimiz şəkli paylaşmağımı xüsusi olaraq istədi. Mən də onun bu istəyini böyük məmnuniyyətlə yerinə yetirirəm. Bu gün keçirilən nəzarət müayinəsində bir daha əmin olduq ki, hər şey qaydasındadır. Belə müsbət nəticələr hər bir həkim və tibb müəssisəsi üçün ən böyük sevincdir."

Həkim Zəhraya və bütün uşaqlara möhkəm cansağlığı, uzun və xoşbəxt ömür arzulayıb.