Sumqayıt Tibb Mərkəzinin nəzdində fəaliyyət göstərən 2 nömrəli Ailə Sağlamlıq Mərkəzinin əməkdaşları tərəfindən əhali arasında sağlam həyat tərzinin təşviqi və qeyri-infeksion xəstəliklərin profilaktikası məqsədilə növbəti maarifləndirici görüş keçirilib.

 

Bu məlumat Aztibb.az-a STM-ən verilib.

 

Maarifləndirici görüş ailə həkimi-terapevt Gülşən Məmmədova və tibb bacısı Mətanət Əliyeva tərəfindən aparılıb. Görüş zamanı iştirakçılara arterial hipertenziya (yüksək qan təzyiqi) və şəkərli diabet haqqında ətraflı məlumat verilib, bu xəstəliklərin risk amilləri, erkən əlamətləri və profilaktikası izah olunub. Eyni zamanda arterial təzyiqin və qanda şəkərin düzgün ölçülməsi qaydaları nümayiş etdirilib, sağlam qidalanmanın, müntəzəm fiziki aktivliyin və sağlam həyat tərzinin əhəmiyyəti diqqətə çatdırılıb.

 

Tədbir zamanı vətəndaşlara İcbari tibbi sığortanın Xidmətlər Zərfi çərçivəsində təqdim olunan profilaktik tibbi xidmətlər barədə məlumat verilib, mütəmadi profilaktik müayinələrdən keçməyin sağlamlığın qorunmasında mühüm rol oynadığı vurğulanıb.

 

Görüş interaktiv formatda davam edib, iştirakçıları maraqlandıran suallar cavablandırılıb. Sumqayıt Tibb Mərkəzi tərəfindən əhalinin sağlamlıq savadlılığının artırılması, xəstəliklərin erkən aşkarlanması və sağlam həyat tərzinin təşviqi məqsədilə bu cür maarifləndirici görüşlərin keçirilməsi mütəmadi olaraq davam etdirilir.