ABŞ-nin Kentukki Universitetinin tədqiqatçıları Altsheymer xəstəliyinin yaranma mexanizmlərinin öyrənilməsi istiqamətində apardıqları araşdırmalar zamanı mühüm elmi nəticələr əldə ediblər.

Bu barədə Aztibb.az www.science.org-a istinadən xəbər verir.

Tədqiqatın nəticələrinə əsasən, xəstələrdə müşahidə olunan yuxu pozğunluqlarının əsas səbəblərindən biri beynin immun sisteminə aid mikroqliya hüceyrələrinin həddindən artıq aktivləşməsi ilə əlaqədardır.

Alimlər eksperimental tədqiqatlar zamanı həmin hüceyrələrin fəaliyyətini tənzimləməklə normal yuxunun əhəmiyyətli dərəcədə bərpa olunmasına nail olublar. Araşdırma göstərib ki, bu nəticə beyində Altsheymer xəstəliyinə xas amiloid zülal lövhələri tam aradan qaldırılmadan da əldə edilə bilər. Mütəxəssislərin fikrincə, bu, xəstəliyin müalicəsinə yeni yanaşmaların hazırlanması üçün mühüm elmi əsas yaradır.

Tədqiqat müəllifləri bildirirlər ki, yuxunun keyfiyyətinin yaxşılaşdırılması beynin fəaliyyətinə müsbət təsir göstərməklə yanaşı, yaddaş funksiyalarının qorunmasına və xəstəliyin inkişaf sürətinin ləngidilməsinə də kömək edə bilər. Bununla belə, əldə olunan nəticələrin klinik praktikada tətbiqi üçün insanlar üzərində əlavə tədqiqatların aparılması zəruridir.

Alimlər hesab edirlər ki, bu istiqamətdə aparılacaq növbəti araşdırmalar Altsheymer xəstəliyinin müalicəsində daha effektiv dərman və terapiya üsullarının hazırlanmasına imkan yarada bilər.