Bir çox insanlar dərman qəbul edərkən tabletləri yarıya bölür. Lakin mütəxəssislər xəbərdarlıq edirlər ki, hər tabletin üzərində bölmə xəttinin (çərtikin) olması onun mütləq bölünə biləcəyi anlamına gəlmir. Bəzi dərmanların bölünməsi dozanın düzgün qəbul edilməməsinə və müalicənin effektivliyinin azalmasına səbəb ola bilər.

Aztibb.az "Cursorinfo" portalına istinadən yazır ki, əczaçı və sağlam həyat tərzi üzrə mütəxəssis Yana Ukraynskayanın sözlərinə görə, istehsalçı tabletin üzərində xüsusi bölmə xətti yerləşdiribsə və təlimatda buna icazə verilirsə, preparatı iki, bəzi hallarda isə dörd hissəyə bölmək mümkündür. Bu cür dərmanlarda aktiv maddə tablet boyunca bərabər paylandığı üçün hər hissə eyni dozada təsiredici maddə ehtiva edir. Bu xüsusilə bəzi hormonal preparatlar üçün xarakterikdir.

Bununla belə, üzərində bölmə xətti olmayan tabletləri və kapsulları özbaşına bölmək olmaz. İstehsalçı xüsusi göstəriş vermədiyi halda, örtüklü (plyonka ilə örtülmüş) tabletlərin də parçalanması tövsiyə edilmir. Belə preparatlarda aktiv maddə bərabər paylanmaya və ya xüsusi örtük sayəsində tədricən sorulmağa bilər. Tableti bölmək isə orqanizmə lazım olandan az və ya çox dozanın daxil olmasına səbəb ola bilər.

Mütəxəssislər dərman qəbul etməzdən əvvəl istifadə təlimatını diqqətlə oxumağı tövsiyə edirlər. Əgər təlimatda tabletin bölünməsinə və ya yarım doza qəbuluna icazə verildiyi göstərilibsə, bu halda onu təhlükəsiz şəkildə bölmək mümkündür.

Əczaçı həmçinin istifadə müddəti bitmiş dərmanların qəbul edilməsinin təhlükəli olduğunu vurğulayıb. İstehsalçının göstərdiyi son istifadə tarixinədək preparatın effektivliyi, təhlükəsizliyi və sabitliyi təmin olunur. Bu müddət bitdikdən sonra isə dərmanın təsir gücü və təhlükəsizliyi zəmanət altında olmur.

Bu xüsusilə antibiotiklər üçün vacibdir. Aktiv maddənin konsentrasiyası azaldıqda müalicə effekt verməyə bilər və bakteriyalarda antibiotiklərə qarşı davamlılıq inkişaf edə bilər. Eyni zamanda, hormonal preparatların da istifadə müddəti bitdikdən sonra qəbul edilməsi tövsiyə olunmur, çünki bu dərmanlarda dəqiq dozanın qəbul edilməsi müalicənin uğuru üçün böyük əhəmiyyət daşıyır.

Həkimlər və əczaçılar bildirirlər ki, dərmanların dozasını özbaşına dəyişmək, tabletləri həkim məsləhəti olmadan bölmək və ya istifadə müddəti bitmiş preparatlardan istifadə etmək sağlamlıq üçün ciddi risklər yarada bilər. Dərmanların düzgün saxlanılması və təlimata uyğun istifadəsi onların effektivliyinin və təhlükəsizliyinin qorunmasının əsas şərtlərindəndir.