Son illər bioloji aktiv qida məhsullarına maraq xeyli artıb. Lakin mütəxəssislər bildirirlər ki, bu məhsullar sağlam həyat tərzini əvəz etmir və yalnız real ehtiyac olduqda, düzgün seçilərək istifadə edilməlidir. Sağlam həyat tərzinin əsasını balanslı qidalanma və müntəzəm fiziki aktivlik təşkil edir.
Bu barədə Aztibb.az-a Azərbaycan Qida Təhlükəsizliyi Agentliyinin (AQTA) İnformasiya təminatı və innovativ həllər şöbəsindən məlumat verilib.
Bioloji aktiv qida məhsullarının təhlükəsiz və düzgün istifadəsi ilə bağlı Azərbaycan Qida Təhlükəsizliyi İnstitutunun eksperti İlqar Şamilov bildirib ki, bu məhsullara marağın artmasının əsas səbəblərindən biri insanların qısa müddətdə nəticə əldə etmək istəyi, eləcə də sosial şəbəkələrdə yayılan tövsiyələrin təsiridir.
Ekspertin sözlərinə görə, məhsul haqqında məlumatsızlıq və ondan istifadə sağlamlıq üçün risk yarada bilər. Bu səbəbdən istehlakçılar məhsul seçərkən onun mənşəyinə, tərkibinə, etibarlılığına və dövlət qeydiyyatından keçməsinə xüsusi diqqət yetirməlidirlər.
AQTA vətəndaşlara bioloji aktiv qida məhsullarından istifadə zamanı yalnız etibarlı mənbələrdən əldə edilən məlumatlara əsaslanmağı, məhsulların təhlükəsizliyini və qanunvericiliyin tələblərinə uyğunluğunu yoxlamağı, həmçinin sağlamlıqla bağlı qərarlar qəbul edərkən mütləq mütəxəssis məsləhətini nəzərə almağı tövsiyə edir.
Bu barədə daha ətraflı link vasitəsilə tanış ola bilərsiniz.
