Böyük Britaniya sakini Lori Denman uzun illər beynində onlarla parazit sürfəsi daşıdığını bilmədən yaşayıb. İlk narahatedici əlamətlər Hindistana etdiyi səfərdən təxminən dörd il sonra ortaya çıxıb.
Aztibb.az bu barədə "The Independent" nəşri istinadən məlumat verir.
Bir gün qadın orqanizmindən təxminən bir metr uzunluğunda lentşəkilli qurdun xaric olduğunu görərək həkimə müraciət edib. Lakin həmin vaxt aparılan müayinələrdə ciddi patologiya aşkarlanmadığı üçün o, adi həyatına davam edib.
Bir müddət sonra Denmanda güclü baş ağrıları başlayıb, bir neçə ay sonra isə ilk epileptik tutma baş verib. Təkrar müayinələr zamanı həkimlər onun beynində donuz soliterinin (Taenia solium) 38 sürfəsini aşkar ediblər və qadına neyrosistiserkoz diaqnozu qoyulub.
Pasiyent uzunmüddətli müalicə kursu keçib. Ona parazitəleyhinə preparatlar, steroidlər və qıcolmaəleyhinə dərmanlar təyin olunub. Xəstəlik müəyyən dövrlərdə nəzarət altına alınsa da, epileptik tutmalar yenidən təkrarlanıb. Daha sonra qadında panik ataklar, psixoz və paranoya inkişaf edib ki, bu səbəbdən o, bir müddət iş fəaliyyətini dayandırmalı olub.
“Başımın içində bu canlıların yaşadığını dərk etmək olduqca dəhşətli idi”, – deyə Lori Denman bildirib.
Hazırda qadın artıq 10 ildir ki, epileptik tutma keçirmir və bu nadir xəstəlik barədə insanların məlumatlılığını artırmaq məqsədilə öz hekayəsini ictimaiyyətlə bölüşmək qərarına gəlib.
Neyrosistiserkoz donuz soliterinin sürfələrinin mərkəzi sinir sisteminə yerləşməsi nəticəsində yaranan ağır parazitar xəstəlikdir. Xəstəlik əsasən gigiyenik şəraitin zəif olduğu bölgələrdə rast gəlinir və yoluxma adətən parazitin yumurtaları ilə çirklənmiş qida və ya suyun qəbulu nəticəsində baş verir. Bu xəstəlik baş ağrısı, epileptik tutmalar, görmə pozğunluğu və digər nevroloji əlamətlərlə özünü göstərə bilər.
Mütəxəssislər riskli ölkələrə səyahət edən şəxslərə yalnız təhlükəsiz qida və su istehlak etməyi, şəxsi gigiyena qaydalarına ciddi riayət etməyi və şübhəli əlamətlər yarandıqda vaxt itirmədən həkimə müraciət etməyi tövsiyə edirlər.
