ABŞ və Cənubi Koreyada 9 milyondan çox yetkin şəxsin iştirakı ilə aparılan yeni beynəlxalq araşdırma infarktların əsas risk amillərini ortaya qoyub. Tədqiqat müəllifləri belə nəticəyə gəliblər ki, infarkt, insult və ürək çatışmazlığı hallarının 99 faizi ən azı dörd klassik risk faktorundan biri ilə əlaqədardır.

Aztibb.az xəbər verir ki, araşdırmanın nəticələri "Journal of the American College of Cardiology" (JACC) jurnalında dərc olunub.

Mütəxəssislər bu dörd əsas risk faktorunu arterial hipertoniya (yüksək qan təzyiqi), qanda xolesterinin yüksək olması, qanda şəkərin artması və siqaret çəkmə kimi müəyyən ediblər. Araşdırmaya əsasən, bu amillər birlikdə ürək-damar sistemi ilə bağlı hadisələrin 99 faizindən əvvəl mövcud olub. Hətta ən aşağı risk qrupuna daxil olan 60 yaşdan aşağı qadınlarda belə bu göstərici 95 faizdən yüksək olub.

Araşdırmada ən geniş yayılmış risk amili arterial hipertoniya olub. Ürək-damar hadisəsi keçirən xəstələrin 93 faizində həm ABŞ-da, həm də Cənubi Koreyada yüksək qan təzyiqi qeydə alınıb. Şimal-Qərb Universitetinin kardioloqları vurğulayırlar ki, iki və ya daha çox risk faktorunun eyni vaxtda olması ürək-damar xəstəliklərinin inkişaf ehtimalını əhəmiyyətli dərəcədə artırır.

Tədqiqat müəllifləri son illər tez-tez səsləndirilən "izaholunmaz infarktlar" fikrinə də münasibət bildiriblər. Onların qənaətinə görə, belə hallarda da risk faktorları mövcud olur, sadəcə onlar daha zəif ifadə edilir və ya insanlar vaxtında müayinədən keçmədikləri üçün bu problemlər aşkar olunmur.

Mütəxəssislər vurğulayırlar ki, arterial təzyiqin, qanda şəkər və xolesterin səviyyəsinin mütəmadi nəzarətdə saxlanılması, siqaretdən imtina, sağlam qidalanma və fiziki aktiv həyat tərzi infarkt və digər ürək-damar xəstəliklərinin qarşısının alınmasında ən təsirli tədbirlər hesab olunur. Erkən diaqnostika və risk amillərinin vaxtında aradan qaldırılması minlərlə insanın həyatını xilas edə bilər.