ATU-nun Tədris Cərrahiyyə Klinikasında 67 yaşlı pasiyentdə prostat vəzinin iri həcmli adenoması ilə bağlı uğurlu cərrahi müdaxilə həyata keçirilib.

Klinikadan Aztibb.az-a bildirilib ki, Urologiya kafedrasının assistenti, Tədris Cərrahiyyə Klinikasının uroloq-cərrahı Rəşad Məmmədovun sözlərinə görə, pasiyent ciddi yanaşı xəstəliklərə malik olub. Belə ki, xəstə daha əvvəl mikroinfarkt keçirib, ürəyində stentlər mövcuddur və uzun illərdir qan durulaşdırıcı preparatlar qəbul edir. Bundan əlavə, ürəyin ejeksiya fraksiyası da aşağı səviyyədə olub ki, bu da əməliyyat riskini artıran əsas amillərdən sayılır.

Müayinə zamanı pasiyentdə prostat vəzinin həcminin 120 kub santimetr olduğu müəyyən edilib. Təxminən üç həftə əvvəl pasiyentdə kəskin sidik ləngiməsi (akut sidik retensiyası) baş verib və o, sərbəst şəkildə sidiyə çıxa bilməyib. İlkin mərhələdə kateterizasiya aparılıb və konservativ müalicə tətbiq olunub. Lakin görülən tədbirlərə baxmayaraq, sidik ifrazı tam bərpa olunmayıb.
Bu səbəbdən pasiyentə transuretral lazer cərrahiyyəsi icra olunub. Əməliyyat zamanı prostat vəzindəki adenoma endoskopik üsulla təmizlənərək sidik axınının bərpası təmin edilib.

Rəşad Məmmədov bildirib ki, bu tip hallarda təkrarlanma riski nəzəri olaraq mövcuddur. Lakin adenoma əməliyyat zamanı tam şəkildə götürülərsə, yenidən yaranma ehtimalı olduqca aşağı olur.
Həkimin sözlərinə görə, prostat adenomasına daha çox 65 yaşdan yuxarı kişilərdə rast gəlinir. Təxminən bir saat davam edən əməliyyat uğurla başa çatıb.