Bu məlumat Aztibb.az-a Elmi-Tədqiqat Ağciyər Xəstəlikləri İnstitutundan verilib.

 

Tədbiri giriş nitqi ilə açan institutun baş direktoru İradə Axundova ağciyər transplantasiyasının ölkə səhiyyəsi üçün strateji əhəmiyyətindən danışıb və bu sahədə müasir yanaşmaların tətbiqinin vacibliyini vurğulayıb.

 

Seminarın rəsmi hissəsində çıxış edən Orqan Donorluğu və Transplantasiyası üzrə Koordinasiya Mərkəzinin İdarə Heyətinin sədri Yeganə Abbasova Azərbaycanda meyit donorlar əsasında transplantasiya proqramının inkişafı barədə məlumat verib. Bildirib ki, indiyədək ölkədə meyit donorlardan götürülmüş 84 orqan transplantasiya olunub.

 

Ağciyər transplantasiyasının həyata keçirilməsi istiqamətində hazırlıq işlərinin aparıldığını diqqətə çatdıransöyləyən mərkəz sədri qeyd edib ki, yaxın gələcəkdə bu sahədə xəstələrin qeydiyyatı üçün xüsusi gözləmə siyahısı formalaşdırılacaq. Aparılan hazırlıq işlərinin nəticəsi olaraq ölkəmizdə təxminən 2027-ci ildən etibarən ağciyər və ürək-ağciyər kompleksi transplantasiyalarının həyata keçirilməsi planlaşdırılır.

 

Türkiyənin Ankara Bilkent Şəhər Xəstəxanasının Ağciyər Nəqli Mərkəzinin mütəxəssisləri – professor Erdal Yekeler, dosent Mehmet Furkan Şahin və Dr. Loğman Rahimli tərəfindən ağciyər transplantasiyasının əsas prinsipləri, xəstə seçimi meyarları, donor orqanların qiymətləndirilməsi, transplantasiya prosesinin mərhələləri, eləcə də Türkiyə və dünya təcrübəsi barədə geniş təqdimatlar keçirilib.

 

Tədbir iştirakçıları qeyd ediblər ki, seminarın nəticələri Azərbaycanda ağciyər transplantasiyası proqramının formalaşdırılmasına və bu sahədə beynəlxalq təcrübənin tətbiqinə mühüm töhfə verəcək.