ABŞ-da aparılan yeni araşdırma göstərib ki, Tip 2 diabet və piylənmənin müalicəsində istifadə olunan GLP-1 qrupuna aid dərmanlar, o cümlədən Ozempic, Wegovy və Mounjaro istifadəçilərin həm market, həm də restoran xərclərini nəzərəçarpacaq dərəcədə azaldır.

Aztibb.az "Journal of Marketing Research" jurnalında dərc olunan araşdırmaya istinadən yazır ki, Kornell Universitetinin alimlərinin hazırladığı bu preparatlardan istifadə edən ailələrdə market xərcləri ilk 6 ay ərzində orta hesabla 5,3 faiz azalıb, yüksək gəlirli ailələrdə isə bu göstərici 8 faizi keçib. Fast-food restoranları və qəhvə şəbəkələrində qida xərclərində də təxminən 8 faizlik azalma qeydə alınıb.

Ən böyük azalma yüksək kalorili və güclü emal olunmuş məhsullarda müşahidə edilib. Duzlu qəlyanaltılar, şirniyyatlar və un məmulatlarına çəkilən xərclər təxminən 10 faiz azalıb. Əvəzində yoqurt, təzə meyvə, protein tərkibli qəlyanaltılar və ət məhsullarına tələbat artıb.

Tədqiqat müəlliflərindən Silvia Hristakevanın sözlərinə görə, dərmanların iştahanı azaltması və toxluq hissini uzatması insanların daha az qida qəbul etməsinə səbəb olur. Araşdırma həmçinin göstərib ki, qida xərclərindəki azalma dərman istifadəsi davam etdiyi müddətdə ən azı bir il qalır, lakin preparat dayandırıldıqdan sonra xərclər tədricən əvvəlki səviyyəyə qayıdır.

Mütəxəssislər hesab edirlər ki, GLP-1 preparatlarının istifadəsi daha da genişlənərsə, bu, qida sənayesində uzunmüddətli dəyişikliklərə səbəb ola bilər. İstehsalçılar və restoranlar məhsul çeşidlərini, porsiya ölçülərini və marketinq strategiyalarını yeni tələblərə uyğunlaşdırmağa məcbur qala bilərlər.

Qeyd edək ki, bu dərmanlar əsasən qan şəkərinin tənzimlənməsi və çəkinin azaldılması üçün istifadə olunur. Onların ən çox rast gəlinən yan təsirləri ürəkbulanma, qusma, ishal və qəbizlikdir. Daha nadir hallarda pankreatit, öd kisəsi xəstəlikləri və böyrək funksiyalarının pozulması kimi ciddi fəsadlar da yarana bilər. Buna görə preparatlar yalnız həkim nəzarəti altında qəbul edilməlidir.