Klinikanın endokrinoloq cərrahı, dosent Azər Hembətovun sözlərinə görə, pasiyent uzun müddətdir xroniki böyrək çatışmazlığı səbəbilə müalicə alır və hemodializ prosedurlarından keçir. Hemodializ fonunda pasiyentdə paratiroid adenoması inkişaf edib. Bu patologiya qanda parathormon (PTH) və kalsium səviyyələrinin yüksəlməsinə səbəb olub.

 

Hormonal pozğunluq nəticəsində pasiyentin sümük toxumasında ikincili patoloji dəyişikliklər yaranıb. Pasiyent əvvəlcə üz-çənə cərrahı tərəfindən müayinə olunub və sümük patologiyası ilə əlaqədar Tədris Cərrahiyyə Klinikasına yönləndirilib. Aparılan ətraflı müayinələr zamanı problemin əsas səbəbinin paratiroid adenoması olduğu müəyyən edilib.

 

Bundan sonra pasiyent əməliyyata götürülüb. Cərrahi müdaxilə endokrinoloq cərrah Azər Hembətov tərəfindən icra olunub. Əməliyyat zamanı sol aşağı paratiroid vəzi xaric edilib. Əməliyyatın radikallığını və çıxarılan toxumanın həqiqətən paratiroid toxuması olduğunu təsdiqləmək üçün intraoperativ parathormon monitorinqi aparılıb. Vəzin çıxarılmasından 15 dəqiqə sonra qanda parathormon səviyyəsinin ilkin göstərici ilə müqayisədə 50 faizdən çox azaldığı müşahidə olunub ki, bu da əməliyyatın uğurlu nəticəsini təsdiqləyib.

 

Təxminən 30 dəqiqə davam edən əməliyyat neyromonitorinq cihazı ilə icra olunub. Bu texnologiya əməliyyat zamanı sinirlərin qorunmasına və mümkün ağırlaşmaların minimuma endirilməsinə imkan yaradıb.

 

Qeyd edək ki, əməliyyatdan sonrakı dövrdə bu tip pasiyentlərdə hipokalsemiya (qanda kalsiumun azalması) inkişaf edə bilər. Bu səbəbdən pasiyentin kalsium göstəriciləri daimi nəzarətdə saxlanılacaq. Kalsiumun sürətlə enməsi fonunda əllərdə və ayaqlarda keyimə, qıcolma və digər simptomlar yarana biləcəyindən, profilaktik məqsədlə pasiyentə intravenoz kalsium dəstəyi göstəriləcək.