Akademik N.N. Burdenko adına Baş Hərbi Klinik Hospitalın mütəxəssisləri A.V. Vişnevski adına Milli Tibbi Cərrahiyyə Tədqiqat Mərkəzinin həmkarları ilə birgə odlu silah yaralanmaları almış pasiyentlərin reabilitasiyası üçün yeni metod təklif ediblər.

Azmedinfo.az “İzvestiya” nəşrinə istinadən xəbər verir ki, yeni metod əvvəllər xroniki işemiya xəstəliyinin müalicəsində istifadə olunan vazoaktiv peptidlərin tətbiqinə əsaslanır. Hospitalın damar cərrahiyyəsi şöbəsinin baş ordinatoru Konstantin Petrovun sözlərinə görə, bu birləşmələr angioprotektiv (damar qoruyucu) effektə malikdir və ağır zədələnmələrdən sonra damar sisteminin bərpasına kömək edir.

Mütəxəssis qeyd edib ki, əməliyyatdanrakı erkən dövrdə peptid terapiyasının müalicəyə daxil edilməsi bərpa proseslərini təxminən 1,5 dəfə sürətləndirməyə imkan verib.

Lakin əldə olunmuş nəticələrin tam təsdiqlənməsi üçün daha geniş pasiyent qrupunun iştirakı ilə əlavə tədqiqatların aparılmasına ehtiyac var.