Türkiyədə süni intellekt dəstəkli yerli kapsül endoskop layihəsi üzrə klinik tədqiqatlar hazırda davam etdirilir. Məqsəd həzm sistemi xəstəliklərinin və xərçəngin erkən diaqnostikasını daha effektiv şəkildə təmin etməkdir.
Aztibb.az "T24"ə istinadən yazır ki, inkişaf etdirilən layihə Səhiyyə Nazirliyi öncülüyündə həyata keçirilir və TÜSEB ilə TÜBİTAK tərəfindən dəstəklənir. Prosesdə Boğaziçi Universiteti mühəndislik infrastrukturu, Ankara Universiteti isə klinik tətbiq mərhələləri üzrə iştirak edir.
Həb kimi udulan texnoloji cihaz
Kapsül endoskopiya xəstənin dərman kimi udduğu kiçik cihaz vasitəsilə mədə və bağırsaqların görüntülənməsinə imkan verir. Yeni nəsil yerli kapsülün süni intellekt dəstəyi ilə qanaxma, şiş və şübhəli lezyonları aşkarlaması nəzərdə tutulur. Layihə çərçivəsində cihazın həkim nəzarəti ilə yönləndirilməsi, lazım gəldikdə biopsiya götürməsi və hədəf nahiyəyə dərman çatdırması kimi funksiyaların da inkişaf etdirilməsi planlaşdırılır.
Hazırda kapsulun kamera sistemi, biopsiya mexanizmi və süni intellekt alqoritmləri üzərində işlər aparılır. Eyni zamanda təhlükəsizlik və effektivlik testləri davam etdirilir.
