Bu günlərdə Fransanın paytaxtı Paris şəhərində Xərçəngin Profilaktikası və Kolposkopiya üzrə Beynəlxalq Federasiyanın (IFCPC) 19-cu Dünya Konqresi keçirilib. Dünyanın müxtəlif ölkələrindən aparıcı alimləri, tədqiqatçıları və səhiyyə mütəxəssislərini bir araya gətirən beynəlxalq tədbir HPV (insan papilloma virusu) ilə əlaqəli xəstəliklərin profilaktikası, skrininqi və müalicəsində son elmi yeniliklərin müzakirə olunduğu nüfuzlu platformalardan biri hesab olunur.

 

Tədbirdə Azərbaycandan olan nümayəndə heyətinin tərkibində Tibb Universitetinin I mamalıq-ginekologiya kafedrasının dosenti, Tədris Cərrahiyyə klinikasının ginekoloqu Sevinc İsmayılova və assistent Ləman Əliyeva da iştirak edib.

 

Bu barədə Aztibb.az-a ATU-dan məlumat verilib.

 

Bildirilib ki, Versal Konqres Sarayında keçirilən tədbir çərçivəsində HPV-yə qarşı vaksinasiya proqramları, uşaqlıq boynu xərçənginin skrininq strategiyaları, kolposkopiyanın müasir imkanları müzakirə olunub. Həmçinin , hamiləlik zamanı HPV infeksiyasının idarə olunması, süni intellektin diaqnostik proseslərdə tətbiqi, fərdiləşdirilmiş tibb yanaşmaları, xərçəngin profilaktikası sahəsində yeni elmi nailiyyətlərin nəşrləri haqqında danışılıb.

 

Dosent Sevinc İsmayılovanın həmmüəllifliyi ilə hazırlanmış “PC_052 – HPV-müsbət hamilə qadınlarda obstetrik və neonatal nəticələr” mövzusunda elmi tezis təqdim edilib. Tezisdə 2022–2024-cü illər ərzində hamilə qadının iştirakı ilə aparılmış prospektiv tədqiqatın nəticələri əks olunub. Tədqiqat nəticələrinə əsasən, HPV-müsbət qadınlarda plasentar dəyişikliklər, damar patologiyaları və intervillöz sahənin genişlənməsi daha çox müşahidə olunub. Həmçinin bu qrupda perineal travmaların, plasentar qüsurların və vaxtından əvvəl doğuşların tezliyinin daha yüksək olduğu müəyyən edilib. Müəlliflər qeyd ediblər ki, hamiləlik dövründə HPV infeksiyası obstetrik və perinatal risklərin artması ilə əlaqəlidir. Bu isə erkən diaqnostikanın, gücləndirilmiş antenatal nəzarətin və fərdiləşdirilmiş klinik yanaşmanın vacibliyini bir daha təsdiqləyir.

 

Azərbaycanlı müəlliflərin hazırladığı tezis konqresin elmi komitəsi tərəfindən müsbət qiymətləndirilib və tədbirin rəsmi nəşr toplusuna daxil edilib. Bu fakt Azərbaycan tibb elminin beynəlxalq elmi platformalarda uğurla təmsil olunduğunu və yerli tədqiqatçıların əldə etdikləri nəticələrin dünya elmi ictimaiyyəti tərəfindən maraqla qarşılandığını göstərir.

 

Qeyd edək ki, 1972-ci ildən etibarən keçirilən IFCPC Dünya Konqresi HPV ilə əlaqəli xəstəliklərin profilaktikası və kolposkopiya sahəsində fəaliyyət göstərən 50-yə yaxın milli cəmiyyəti bir araya gətirən ən nüfuzlu beynəlxalq elmi tədbirlərdən biridir. Konqresin əsas məqsədi uşaqlıq boynu və digər HPV ilə əlaqəli xərçənglərin qlobal yükünün azaldılması, elmi bilik və təcrübə mübadiləsinin genişləndirilməsi, həmçinin bu sahədə beynəlxalq əməkdaşlığın gücləndirilməsidir.