Rusiyada həkimlər 35 yaşlı qadın üzərində uğurlu əməliyyat apararaq təxminən 8 kiloqram çəkisi olan nəhəng törəməni çıxarıblar.

Aztibb.az "Life" portalına istinadən yazır ki, bu barədə Çelyabinski vilayət Səhiyyə Nazirliyinin mətbuat xidməti məlumat yayıb.

Məlumata görə, şiş təsadüfən aşkar edilib. Qadın heç bir ağrı hiss etməyib və sağlamlığı ilə bağlı şikayət etməyib. Yaxın zamanda doğuş etdikdən sonra qarnının ölçülərinin kiçilməməsi həkimlərdə şübhə yaradıb və əlavə müayinələr təyin olunub. Ultrasəs müayinəsi və kompüter tomoqrafiyası qarın boşluğunda iri ölçülü şişin olduğunu üzə çıxarıb.

Bildirilib ki, Çelyabinsk Vilayət Klinik Onkologiya və Nüvə Təbabəti Mərkəzində qarın boşluğunda yerləşən 40 santimetr ölçülü şişlə bağlı mürəkkəb əməliyyat həyata keçirilib. Pasiyentə kombinə olunmuş cərrahi müdaxilə aparılıb, şiş tam çıxarılıb, eyni zamanda sağ böyrək götürülüb və diafraqmanın bir hissəsi rezeksiya edilib.

Mərkəzin baş həkiminin cərrahi xidmət üzrə müavini İvan Qavrişkin qeyd edib ki, bir çox şişlər ilkin mərhələdə ağrı vermədiyindən gec aşkarlanır. Onun sözlərinə görə, ağrı sindromu adətən xəstəlik qonşu orqan və toxumalara yayıldıqdan sonra meydana çıxır.

Histoloji müayinənin nəticələri göstərib ki, törəmə liposarkoma piy toxumasından inkişaf edən bədxassəli şiş olub. Şiş aydın kapsulla əhatələnmiş vahid düyün şəklində olub və həkimlər onu tam şəkildə çıxarmağa nail olublar.