Hər gün istifadə etdiyimiz dişlərimiz haqqında əslində düşündüyümüzdən daha az məlumatımız var. Bu suallardan biri də böyüklərdə adətən niyə məhz 32 dişin olmasıdır. Bəs ağız boşluğumuzda niyə dəqiq olaraq 32 diş yerləşir? Bu rəqəm təsadüfən müəyyənləşdirilibmi?

Aztibb.az "Life" portalına istinadən yazır ki, cavab insan orqanizminin milyonlarla il davam edən təkamül prosesində gizlənir.

Normal şəraitdə yetkin insanın ağız boşluğunda 32 daimi diş olur. Bu dişlər sadəcə say baxımından bütövlük yaratmır, onların hər biri fərqli funksiyalar yerinə yetirir.

Ön hissədə yerləşən kəsici dişlər qidanın doğranmasına kömək edir, köpək dişləri isə qidanın qoparılması funksiyasını daşıyır. Arxa hissədə yerləşən kiçik və böyük azı dişləri isə qidaları əzərək həzm prosesinə hazırlayır.

Alimlərin fikrincə, insanların həm heyvan mənşəli, həm də bitki mənşəli qidalarla qidalanan canlılar olması bu müxtəlif diş quruluşlarının formalaşmasını zəruri edib.

İnsan çənəsinin ölçüsü və qidalanma tələbatı nəzərə alındıqda, 32 diş çeynəmə səmərəliliyi baxımından ən optimal say hesab olunur. Dişlərin sayının az olması qidanın kifayət qədər xırdalanmasını çətinləşdirə bilər. Əksinə, daha çox diş çənədə sıxlıq yarada və dişlərin düzgün yerləşməsinə mane ola bilər.

İnsan anatomiyası zamanla həm çənənin ölçülərinə, həm də qidalanma vərdişlərinə uyğun şəkildə inkişaf edib. Qidalanma tərzi, çənə quruluşu və təkamül nəticəsində formalaşan bu sistem qidaların mümkün qədər səmərəli çeynənməsini təmin edir.

Məhz buna görə də ağız boşluğundakı 32 diş insan orqanizminin ehtiyaclarına ən uyğun və ən funksional say hesab olunur.