Tədris Cərrahiyyə Klinikasında aşağı ətrafların ağır dərəcəli varikoz xəstəliyindən əziyyət çəkən pasiyent üzərində müasir endovenoz lazer əməliyyatı uğurla icra olunub.

 

Aztibb.az-a Klinikadan verilən xəbərə görə, ümumi cərrah Babək Abbasəliyev bildirib ki, pasiyent uzun illərdir aşağı ətraflarda varikoz genişlənmədən əziyyət çəkib. Müayinələr zamanı xəstədə sol aşağı ətrafda geniş yayılmış venoz çatışmazlıq, lipodermatoskleroz və CEAP təsnifatına əsasən C6 mərhələsinə uyğun ağır dərəcəli varikoz xəstəliyi aşkarlanıb.

 

Əməliyyata qərar verilməzdən əvvəl pasiyent ətraflı müayinədən keçirilib. Doppler ultrasəs müayinəsi nəticəsində böyük dərialtı venanın (vena saphena magna) diametrinin 13–14 mm olduğu və ciddi venoz reflüksün mövcudluğu müəyyən edilib. Müayinələrin nəticələrinə əsasən cərrahi müdaxilə planlaşdırılıb.

 

Pasiyentə endovenoz lazer ablasiya (EVLA) əməliyyatı icra olunub. Müasir və minimal invaziv üsul hesab edilən bu metod geniş kəsiklər olmadan həyata keçirilir və pasiyentin daha qısa müddətdə gündəlik həyatına qayıtmasına imkan yaradır, əməliyyatın müddəti təxminən 1 saat – 1 saat 15 dəqiqə təşkil edir.

 

Babək Abbasəliyev qeyd edib ki, aşağı ətrafların varikoz xəstəliyi vaxtında müalicə olunmadıqda ciddi fəsadlara səbəb ola bilər. Bu fəsadlar sırasında trofik xoraların yaranması, dərin vena trombozu, tromboflebit və ən təhlükəli ağırlaşmalardan biri hesab edilən ağciyər tromboemboliyası yer alır.

 

Mütəxəssisin sözlərinə görə, varikoz xəstəliyinin yaranmasında genetik meyl mühüm rol oynayır və halların təxminən 70 faizində irsi faktorlar müşahidə edilir. Bundan əlavə, uzun müddət ayaqüstə qalmaq, artıq çəki, azhərəkətli həyat tərzi və digər risk amilləri də xəstəliyin inkişafına təsir göstərə bilər.