ATU-nun Tədris Cərrahiyyə Klinikasında reproduktiv sağlamlığa mənfi təsir göstərən və kişi sonsuzluğunun əsas səbəblərindən hesab olunan varikosel diaqnozu ilə müraciət edən pasiyent üzərində uğurlu cərrahi əməliyyat icra edilib.

 

Aztibb.az xəbər verir ki, Tədris Cərrahiyyə Klinikasının uroloq-cərrahı, assistent Vasif İsmayılın sözlərinə görə, əməliyyat olunan pasiyent 19 yaşlı gənc olub və müayinələr zamanı onda soltərəfli III dərəcəli varikosel aşkarlanıb.

 

“Pasiyentdə toxum ciyəsi venalarının nəzərəçarpacaq dərəcədə genişlənməsi müşahidə olunurdu. Aparılan laborator müayinələr, o cümlədən spermoqramma nəticələri oliqoastenozoospermiya – spermatozoidlərin həm sayının, həm də hərəkətliliyinin azalmasını göstərirdi. Bu hal gələcəkdə reproduktiv funksiyanın pozulmasına səbəb ola biləcəyindən cərrahi müdaxilə üçün birbaşa göstəriş hesab olunur”, deyə həkim bildirib. Mütəxəssis qeyd edib ki, varikosel xaya ətrafındakı venaların genişlənməsi ilə xarakterizə olunan geniş yayılmış uroloji xəstəlikdir. Xəstəlik xüsusilə yeniyetmə və gənc yaşlarda daha çox müşahidə edilir.

 

“Varikoselin yaranmasında əsas rol venoz qapaq çatışmazlığı və damar quruluşunun anatomik xüsusiyyətləri ilə bağlıdır. Bu xəstəlik infeksion və ya keçici xarakter daşımır. Bəzi hallarda irsi meyllilik də müşahidə oluna bilər. Bununla belə, hər varikosel əməliyyat tələb etmir. Müalicə taktikasının seçilməsi üçün düzgün diaqnostika və pasiyentin klinik vəziyyətinin dəqiq qiymətləndirilməsi vacibdir”, deyə V. İsmayıl vurğulayıb.

 

Həkimin sözlərinə görə, vaxtında aşkar edilməyən və müalicə olunmayan varikosel bir sıra ciddi fəsadlara səbəb ola bilər:“Pasiyentlərdə xaya nahiyəsində ağrı və ağırlıq hissi yarana bilər. Uzun müddət davam edən venoz durğunluq xaya toxumasında struktur dəyişikliklərə, ölçüsünün kiçilməsinə (atrofiyaya), hormon ifrazının pozulmasına və sperma keyfiyyətinin pisləşməsinə gətirib çıxara bilər. Nəticədə kişi sonsuzluğu riski artır”.

 

Pasiyent üzərində inguinal varikoselektomiya əməliyyatı icra olunub. Mütəxəssislər bildirirlər ki, yeniyetmə və gənc kişilərdə xaya nahiyəsində ağrı, ağırlıq hissi, damar genişlənməsi və ya reproduktiv sağlamlıqla bağlı problemlər müşahidə edildikdə vaxtında uroloqa müraciət etmək vacibdir. Erkən diaqnostika və düzgün müalicə gələcəkdə yarana biləcək sonsuzluq riskinin qarşısının alınmasında mühüm əhəmiyyət daşıyır.