ATU-nun Tədris Cərrahiyyə Klinikasında anadangəlmə boyun patologiyası olan boyunun orta kistası diaqnozu ilə müraciət edən pasiyent üzərində uğurlu cərrahi əməliyyat icra olunub.

 

Klinikadan Aztibb.az-a bildirilib ki, əməliyyat ATU-nun Ağız və üz-çənə cərrahiyyəsi kafedrasının müdiri, Tədris Cərrahiyyə Klinikasının üz-çənə cərrahı, professor Çingiz Rəhimovun rəhbərliyi ilə həyata keçirilib.

 

Professor Çingiz Rəhimovun sözlərinə görə, boyunun orta kistası embrional inkişaf dövründə yaranan anadangəlmə patologiyalardan biridir: “Boyunun orta kistası qalxanabənzər vəzin embrional inkişafı zamanı formalaşan tiroqlossal axacağın tam bağlanmaması nəticəsində meydana gəlir. Normal halda ana bətnində mövcud olan bu axacaq müəyyən inkişaf mərhələsindən sonra tamamilə bağlanmalıdır. Lakin bəzi hallarda həmin kanalın qalıqları qalır və sonradan kista şəklində özünü göstərir”.

 

Professor bildirib ki, bu patologiya daha çox uşaqlarda aşkarlansa da, bəzi hallarda uzun illər simptomsuz gediş göstərərək yalnız yeniyetmə və ya yetkin yaşlarda üzə çıxa bilər: “Pasiyentlər adətən boyunun ön səthində yaranan şişkinlik, narahatlıq hissi, udqunma zamanı hərəkət edən törəmə və ya iltihablaşma əlamətləri ilə həkimə müraciət edirlər. Vaxtında müalicə olunmadıqda kistanın infeksiyalaşması, irinləməsi və təkrarlanan iltihabi proseslərin inkişafı mümkündür”.

 

Müayinələr zamanı pasiyentdə boyunun orta xətti boyunca yerləşən kistik törəmə aşkar olunub. Aparılan klinik və instrumental müayinələrin nəticələrinə əsasən cərrahi müdaxilə qərarı verilib.

Əməliyyat zamanı kista ətraf toxumalardan dəqiqliklə ayrılaraq tam şəkildə xaric edilib. Cərrahi müdaxilə boyun nahiyəsinin anatomik baxımdan mürəkkəb sahəsində aparılıb. Bu bölgədə həyati əhəmiyyətli damarlar, sinirlər və digər vacib anatomik strukturlar yerləşdiyindən əməliyyat yüksək peşəkarlıq və dəqiqlik tələb edib.

 

“Boyun nahiyəsi insan orqanizmində ən həssas anatomik zonalardan biridir. Burada çoxsaylı magistral damarlar, sinirlər və həyati vacib orqanlar yerləşir. Buna görə də əməliyyat zamanı əsas məqsəd patologiyanı tam aradan qaldırmaqla yanaşı, sağlam toxumaların və ətraf anatomik strukturların zədələnməsinin qarşısını almaqdır” deyə professor Çingiz Rəhimov vurğulayıb.

Mütəxəssislər qeyd edirlər ki, boyun nahiyəsində hər hansı şişkinlik və ya törəmə müşahidə olunduqda vaxt itirmədən həkimə müraciət etmək vacibdir. Erkən diaqnostika və düzgün cərrahi müalicə xəstəliyin ağırlaşmalarının qarşısının alınmasında mühüm rol oynayır.