Səhiyyə Nazirliyi Respublika QİÇS-lə Mübarizə Mərkəzi (RQMM) və Ə.Əliyev adına Azərbaycan Dövlət Həkimləri Təkmilləşdirmə İnstitutu (ADHTİ) arasında klinik baza haqqında müqavilə imzalanıb.

 

Bu məlumat Aztibb.az-a RQMM-dən verilib.

 

Bildirilib ki, müqavilənin məqsədi əhaliyə göstərilən tibbi xidmətlərin keyfiyyətinin yüksəldilməsi, tibbi təhsilin inkişafı, səhiyyə sahəsində innovativ yanaşmaların və informasiya texnologiyalarının tətbiqinin genişləndirilməsi, həmçinin davamlı tibbi təhsil, rezidentura və doktorantura proqramlarının daha səmərəli təşkili istiqamətində əməkdaşlığın gücləndirilməsidir.

 

Əməkdaşlıq çərçivəsində ADHTİ-nin tədris proqramlarında nəzərdə tutulan İİV infeksiyası və QİÇS modulu üzrə tibb işçilərinin, tələbə və rezidentlərin təkmilləşməsi və praktiki biliklərə yiyələnməsi məqsədilə tədris prosesi Respublika QİÇS-lə Mübarizə Mərkəzində təşkil olunacaqdır. Mərkəz tərəfindən təkmilləşdirmə, yenidənhazırlanma və peşə hazırlığı kurslarında iştirak edən həkimlərin, eləcə də rezident və doktorantların praktik tədris prosesinin təşkili üçün zəruri şərait yaradılıb.

 

Bu əməkdaşlıq tibb mütəxəssislərinin peşəkar bilik və bacarıqlarının artırılmasına, elmi-pedaqoji fəaliyyətin inkişafına və səhiyyə xidmətlərinin daha da təkmilləşdirilməsinə mühüm töhfə verəcək.