Eksperimental xərçəng əleyhinə preparat digər müalicə üsullarına cavab verməyən onkoloji xəstəliklərə qarşı ümidverici nəticələr göstərib.

Aztibb.az “The Guardian” qəzetinə istinadən yazır ki, bəzi xəstələrdə vaksin tətbiq edildikdən cəmi bir neçə həftə sonra şişlər tamamilə yox olub.

Preparat xərçəng hüceyrələrinə eyni vaxtda bir neçə istiqamətdən təsir göstərir. O, epidermal böyümə faktoru reseptorunu (EGFR) və MET protoonkogenini hədəf alaraq şişin inkişafını məhdudlaşdırmağa çalışır.

Araşdırmada 11 ölkədən baş-boyun nahiyəsinin xərçəngindən əziyyət çəkən 102 xəstə iştirak edib. Nəticələrə əsasən, 43 pasiyentdə şişlərin ölçüsü əhəmiyyətli dərəcədə kiçilib və ya tamamilə yox olub. Onlardan 28 nəfərdə şişlər nəzərəçarpacaq dərəcədə kiçilib, 15 nəfərdə isə tam remissiya qeydə alınıb. Oxşar nəticələr ağciyər xərçəngi olan xəstələrdə də müşahidə edilib.

Londondakı Xərçəng Araşdırmaları İnstitutunun bioloji xərçəng terapiyası üzrə professoru, Kevin Harrington bildirib ki, bu nəticələr həm kimyaterapiyaya, həm də immunoterapiyaya davamlı xəstələr üçün görünməmiş dərəcədə güclü cavab hesab olunur:

“Bu, həm kimyaterapiyaya, həm də immunoterapiyaya qarşı rezistentlik inkişaf etmiş xəstələrdə müşahidə edilən misilsiz nəticədir. Belə pasiyentlər üçün müalicə variantları son dərəcə məhduddur. Buna görə də əldə olunan fayda olduqca diqqətəlayiqdir”.

Tədqiqatın nəticələrinə görə, vaksin qəbul edən xəstələrin orta sağqalım müddəti 12,5 ay təşkil edib. Bu göstərici onların ağır klinik vəziyyəti və əlverişsiz proqnozu nəzərə alındıqda xüsusilə əhəmiyyətli hesab olunur.

Preparat 2021-ci ilin may ayında ABŞ-da, həmin ilin dekabrında isə Avropa İttifaqında istifadəyə təsdiq alıb. Professor Harrinqton əldə olunan remissiya səviyyəsini xərçəng müalicəsində “əhəmiyyətli irəliləyiş” kimi qiymətləndirib.

Mütəxəssislər vurğulayırlar ki, nəticələr ümidverici olsa da, preparatın effektivliyi və uzunmüddətli təsirləri ilə bağlı daha geniş klinik tədqiqatların aparılmasına ehtiyac var.