Seçenov Universiteti alimləri onkoloji xəstəliklərin müalicəsində yeni yanaşmalar üzərində çalışarkən təsadüfən ksenon qazına diqqət yönəldiblər. Daha əvvəl əsasən heroin asılılığının müalicəsində istifadə olunan bu qazın indi onkologiyada da perspektivli ola biləcəyi bildirilir.

Aztibb.az "Discover24"ün məlumatına istinadən yazır ki, mütəxəssislərin sözlərinə görə, ksenon sakitləşdirici və damar qoruyucu xüsusiyyətlərə malikdir. Xüsusilə qan damarlarının daxili qatı olan endotelin qorunması baxımından onun mühüm təsir göstərə biləcəyi qeyd olunur. Endotel toxumaların normal qan təchizatında əsas rol oynayır.

Alimlər bildirirlər ki, kimyaterapiya zamanı xəstələrin ürək-damar sistemi ciddi zədələnə bilər. Ksenonun üstünlüyü isə ondan ibarətdir ki, digər bəzi anesteziklərdən fərqli olaraq ürəyin fəaliyyətini zəiflətmir və arterial təzyiqdə ciddi enmə yaratmır. Bu xüsusiyyətlər onu onkologiyada istifadə üçün potensial namizədə çevirir.

Hazırda Seçenov Universitetində ksenonun onkoloji xəstələrdə orqan qoruyucu vasitə kimi təsirini araşdıran dünyada ilk tədqiqat aparılır. Alimlər hesab edirlər ki, əgər nəticələr müsbət olarsa, bu yanaşma kimyaterapiya alan xəstələrin müalicə prosesini daha təhlükəsiz və komfortlu edə bilər.

Mütəxəssislər vurğulayırlar ki, ksenonun xərçəngi birbaşa müalicə etdiyi barədə danışmaq hələ tezdir. Lakin onun orqanizmi kimyaterapiyanın ağır təsirlərindən qoruma potensialı onkologiyada yeni imkanlar aça bilər.

Araşdırma müəlliflərinin fikrincə, ksenonun effektivliyi təsdiqlənərsə, bu, minlərlə onkoloji xəstə üçün mühüm dəstək vasitəsinə çevrilə bilər.