Klinikadan Aztibb.az-a bildirilib ki, Azərbaycan Tibb Universitetinin (ATU) II cərrahi xəstəliklər kafedrasının dosenti, klinikanın ümumi cərrahı Vüqar Abbasov bildirib ki, pilonidal sinus – xalq arasında “tük dönməsi” kimi tanınan patologiya – lazer ablasiya metodu ilə kəsiksiz, ağrısız və qansız şəkildə müalicə edilir.

 

Həkimin sözlərinə görə, bu üsul zamanı heç bir tikiş və yara izi olmur. Pasiyent əməliyyatdan qısa müddət sonra aktiv həyatına qayıda bilir və əksər hallarda növbəti gün evə buraxılır. Müəyyən müddət nəzarətdə saxlanıldıqdan sonra isə tam sağalma müşahidə olunur.

 

Vüqar Abbasov qeyd edib ki, pilonidal sinus kifayət qədər geniş yayılmış patologiyadır. Lakin bir çox insanlar xəstəliyin fərqində olmurlar. Çünki iltihablaşma baş vermədiyi hallarda xəstəlik oma-büzdüm nahiyəsində xırda dəliklər şəklində özünü göstərə bilər və uzun müddət narahatlıq yaratmaya bilər.