2026-cı ilin 5–7 may tarixlərində ÜST-ün təşəbbüsü ilə Bakı şəhərində prioritet zoonoz xəstəliklərin birgə risk qiymətləndirilməsinə həsr olunmuş seminar təşkil olunub.

Bu barədə Aztibb.az-a Səhiyyə Nazirliyindən xəbər verilib.

Tədbirin məqsədi aidiyyəti üzrə müxtəlif dövlət qurumlarını, beynəlxalq təşkilatları və mütəxəssisləri bir araya gətirərək insan, heyvan və ətraf mühit sağlamlığı sahəsində əməkdaşlığın genişləndirilməsidir.

Tədbirdə Azərbaycan Respublikası Səhiyyə Nazirliyinin İctimai səhiyyə və xəstəliklərə nəzarət şöbəsinin müdiri Nəzifə Mürsəlova açılış nitqi ilə çıxış etmişdir. Tədbirdə eyni zamanda, ÜST Azərbaycan Ofisinin nümayəndəsi də iştirakçıları salamlamışdır.

Seminar çərçivəsində “One Health” (Vahid Sağlamlıq) yanaşmasının əhəmiyyəti xüsusi vurğulanıb. Bu yanaşma zoonoz xəstəliklərin və digər sağlamlıq təhdidlərinin vaxtında aşkarlanması, qiymətləndirilməsi və qarşısının alınması üçün çoxşaxəli və sektorlararası əməkdaşlığı təşviq edir.
2023-cü ildə ölkədə keçirilmiş ÜST-ün Birgə Xarici Qiymətləndirmə missiyasının tövsiyələrinə əsasən səhiyyə sahəsində “Vahid Sağlamlıq” yanaşmasının genişləndirilməsi istiqamətində bir sıra addımlar atılmışdır, multisektoral əməkdaşlıq inkişaf etməkdədir.
Tədbirin məqsədi prioritet zoonoz

xəstəliklər üzrə risklərin birgə qiymətləndirilməsi potensialını gücləndirmək və idarəetməni təkmilləşdirmək olmuşdur.
İştirakçılar ilkin qiymətləndirmələr aparıb, risklərin idarə olunması və kommunikasiya yollarını müzakirə ediblər.
Yekunda prosesin institusionallaşdırılması üçün növbəti addımlar müəyyənləşdirilib.