18-24 noyabr "Ümumdünya Antibiotiklərlə bağlı Maarifləndirmə Həftəsi"dir.

Aztibb.az xəbər verir ki, “Ümumdünya Antibiotiklərlə bağlı Maarifləndirmə Həftəsi” Ümumdünya Səhiyyə Təşkilatının (ÜST) təşəbbüsü əsasında antibiotiklərə qarşı yaranan rezistentliklə bağlı qlobal maarifləndirmənin səviyyəsini artırmaq, antibiotiklərdən düzgün istifadəni təbliğ etmək və nəticədə antibiotiklərə qarşı davamlılığın qarşısını almaq məqsədilə bütün dünyada geniş miqyaslı tədbirlər vasitəsilə hər ilin noyabr ayında qeyd edilir.

ÜST-ün məlumatına görə, antibiotiklərin təxminən 50%-i düzgün təyinatla istifadə olunmur, nəticədə antibiotiklərə qarşı rezistentlik halları artmaqda davam edir. Ümumiyyətlə, hər il təxminən 700 min insan antibiotiklərə davamlı bakteriyaların yaratdığı xəstəliklərdən həyatını itirir. 2050-ci ilədək bu rəqəmin on milyona yaxınlaşacağı gözlənilir.

Bütün bunlar nəzərə alınaraq 2020-ci ildə “Ümumdünya Antibiotiklərlə bağlı Maarifləndirmə Həftəsi” "Antibiotiklər: ehtiyatla davranın" şüarı altında qeyd olunur. Antibiotiklər yalnız həkim nəzarəti və təyinatı əsasında xəstəliyin gedişinə uyğun olaraq istifadə edilməlidir. Antibiotiklərdən özbaşına istifadə yolverilməzdir!