Stresin sinir sistemi üzərində çox güclü və çoxşaxəli təsiri var. Uzun müddət davam edən psixoloji gərginlik sinir hüceyrələrinin fəaliyyəti və beyin funksiyalarını pozur. Bu da nəticədə baş ağrıları, əsəbilik, diqqət dağınıqlığı və yaddaş zəifləməsi ilə müşahidə olunur.

 

Bu barədə Aztibb.az-a Nizami Tibb Mərkəzinin həkim-nevroloqu Günel İlyasova bildirib.

 

Həkimin sözlərinə görə, stres yuxu pozğunluqlarının ən əsas səbəblərindən biridir. Pasiyentlər çox zaman gec yatmaq, tez-tez oyanmaq və ya tamamilə yuxuya gedə bilməmək kimi şikayətlərlə müraciət edirlər. Bu da gün ərzində yorğunluq, reaksiyaların ləngiməsi və ümumi psixi gərginlik yaradır.

 

Günel İlyasova qeyd edib ki, stres zamanı simpatik sinir sistemi aktivləşir və bu zaman ürək döyüntüləri artır, nəfəs sürətlənir, əzələlər gərgin olur. Bu vəziyyət davam etdikcə bədənin "istirahət və bərpa" funksiyası olan parasimpatik sistem düzgün işləyə bilmir və bu da həm yuxuya, həm də ümumi sinir sisteminin sağlamlığına mənfi təsir göstərir:

 

"Stresin sinir sisteminə təsirini azaltmaq üçün müntəzəm istirahət, yüngül fiziki hərəkətlər, texnoloji vasitələrdən uzaq qalmaq və yuxu rejiminə ciddi əməl etmək çox önəmlidir. Əgər bu tədbirlərə baxmayaraq, vəziyyət dəyişmirsə, mütəxəssisə müraciət etmək vacibdir".