Azərbaycanın görkəmli bəstəkarı, Xalq artisti Tofiq Bakıxanov bu günlərdə gözündən əməliyyat olunub. Hər iki gözdə qlaukoma (qarasu), fəsadlı katarakta, yaşla bağlı makulo distirofiyası diaqnozu qoyulmuş 95 yaşlı bəstəkarın üzərində əməliyyatı Azərbaycan Tibb Universitetinin Oftalmologiya kafedrasının müdiri, professor Paşa Qəlbinur həyata keçirib.
Əməliyyatla bağlı professor Paşa Qəlbinur Aztibb.az-a bildirib ki, hazırda Tofiq Bakıxanov özünü yaxşı hiss edir və görmə qabiliyyəti 100 faiz bərpa olunub: “Apardığımız 3 mürəkkəb əməliyyat dünyada az rast gəlinən, nadir hesab olun əməliyyatlar sırasındadır. Dekabrın 8-də böyük sənətkarımızın 95 yaşı tamam olacaq. O, yüksək əhval-ruhiyyə ilə yubiley tədbirinə hazırlaşır. Yeni mahnılar bəstələyir”.
Paşa Qəlbinur Xalq artisti Tofiq Bakıxanovun onun şeirlərinə də mahnı bəstələdiyini diqqətə çatdırıb.
