TƏBİB-in İcraçı direktorunun tapşırığına əsasən qurumun tabeliyində fəaliyyət göstərən tibb müəssisələrində reanimotoloji-anestezioloji xidmətin gücləndirilməsi məqsədilə Yeni Klinikada təşkil olunan təlimlərin ikinci mərhələsi də yekunlaşıb.
Aztibb.az bu barədə TƏBİB-ə istinadla xəbər verir.
Təlim proqramı çərçivəsində Qazax, Şəmkir, Tovuz, Ağstafa və Gədəbəy rayon mərkəzi xəstəxanalarının reanimasiya və anesteziologiya şöbələrində çalışan 5 həkim və 20 orta tibb işçisi Yeni Klinikada keçirilən praktiki və nəzəri hazırlıq mərhələsini uğurla tamamlayaraq yekun qiymətləndirmədən keçib və sertifikatlarla təmin olunub.
TƏBİB-in İcraçı direktorunun müşaviri, Yeni Klinikanın Reanimasiya şöbəsinin müdiri Emil Qasımovun rəhbərliyi ilə həyata keçirilən təlim zamanı iştirakçılar Reanimasiya və anesteziologiya şöbəsində praktiki və nəzəri biliklərini artırmaqla yanaşı, TƏBİB Akademiyasında təşkil olunan seminar və təlim sessiyalarında iştirak ediblər.
Tədris müddətində Reanimasiya şöbəsinin müdiri Emil Qasımov, Əməliyyatxana bölməsinin müdiri, anestezioloq-reanimatoloq Lalə Əliyeva, anestezioloq-reanimatoloq Aysel Əhmədova və Reanimasiya şöbəsinin böyük tibb bacısı Gülşən Allahverdiyeva tərəfindən TƏBİB Akademiyasında müxtəlif mövzular üzrə seminar və praktik məşğələlər keçirilib.
Qeyd ki, təlimlərin ilk mərhələsində Qazax, Şəmkir, Tovuz, Ağstafa və Gədəbəy rayon mərkəzi xəstəxanalarının Reanimasiya-anesteziologiya şöbəsində çalışan 7 həkim və 19 orta tibb işçisi iştirak edib.
Təlimlərin sonunda ixtisasartırma kursunun təşkilində göstərdikləri yüksək peşəkarlıq və dəstəyə görə Əməliyyatxana bölməsinin müdiri, anestezioloq-reanimatoloq Lalə Əliyeva, reanimatoloq-anestezioloq Bayram Nuriyev, eləcə də anesteziya üzrə tibb bacısı Sevda Möhbalıyeva təşəkkürnamə ilə təltif ediliblər.
Xatırladaq ki, bölgələrdə göstərilən reanimotoloji və anestezioloji xidmətlərin səviyyəsinin yüksəldilməsinə, pasiyent məmnuniyyətinin artırılmasına və tibbi heyətin peşəkar inkişafına töhfə verməyi hədəfləyən təlimlərə TƏBİB tabeliyində fəaliyyət göstərən digər tibb müəssisələrinin də cəlb olunması nəzərdə tutulub.
