"Telogen effluvium yaranan insanın orqanizmində olan bəzi dəyişikliklər daha çox tükü telogen fazasına itələyir".

Aztibb.az xəbər verir ki, bunu kosmetoloq-trixoloq Xatirə Şirəliyeva telogen saç tökülməsinin səbəblərindən danışarkən deyib.

O bildirib ki, tellogen effluviumu olan şəxsdə 100 tük əvəzinə, 300 tük tökülür:

"İnsanın saç köklərinin 85-90%-i aktiv olaraq böyüyərkən (anogen faza), digər saç kökləri dincəlir (telogen faza). Bir saç 2-4 il anogen fazada olur, daha sonra telogen fazaya keçir. 2-4 ay dinlənir və tökülür. Tökülən saçların yerinə yeni böyüyən saçlar gəlir. Telogen effluvium yaranan insanın bəzi orqanizmində olan dəyişikliklər daha çox tükü telogen fazasına itələyir. Bu vəziyyətdə tüklərin 30%-i böyüməni dayandırır və tökülmədən əvvəl dinlənmə vəziyyətinə keçir. Yəni, tellogen effluviumunuz varsa 100 tük əvəzinə, 300 tük töküləcək".

Trixoloq telogen effluviumun yaranma səbəblərindən də danışıb.

"Telogen effluvium bir çox səbəblərdən yarana bilər. Bunlara cərrahi müdaxilə, böyük psixoloji stres, yüksək temperatur, infeksion xəstəliklər, hormonal dəyişikliklər, dəmir əksikliyi, hipotiroidizm və ya supertiroidizm aiddir. Bundan başqa dietada dəyişiklik, çox çəki itirmə də telogen effluviumun yaranmasına səbəb ola bilir", - trixoloq qeyd edib.

O, vurğulayıb ki, əgər yastıq üzünüzdə, hamamda və darağınızda daha çox saç görürsünüzsə, demək bu problem sizdə də var.