TƏBİB-in region xəstəxanalarının inkişaf etdirilməsi, tibb müəssisələrinin modernləşməsi, onların yeni tibbi avadanlıqlarla təmin olunması, paytaxtdan asılılığının azaldılması və beləliklə, keyfiyyətli tibbi xidmətlərə əlçatanlığının təmin edilməsi istiqamətində gördüyü işlər müsbət nəticələr verir.

 

Qəbələ Rayon Mərkəzi Xəstəxanasında ilk dəfə icra edilən cərrahi əməliyyat 1982-cü il təvvəllüdlü şəxs üzərində aparılıb. Endometrial polip diaqnozu ilə tibb müəssisəsinə müraciət edən qadın üzərində histeroskopik polipektomiya (polipin histeroskopik üsulla götürülməsi) əməliyyatı uğurla icra edilib.

 

Bu barədə Aztibb.az-a Qəbələ RMX-dan məlumat verilib.

 

Bildirilib ki, cərrahi əməliyyat həkim-cərrah-mama-ginekoloq Qızxanım Rəşid, assistent həkim-cərrah-uroloq Elçin Bağırlı və həkim-anestezioloq-reanimatoloq Həyat Ədilova tərəfindən icra edilib.

 

Əməliyyatdan sonra pasiyentə zəruri tibbi xidmətlər göstərilib və vəziyyəti qənaətbəxş qiymətləndirildiyindən o, ambulator müalicə üçün evə buraxılıb.

 

Qeyd edək ki, bugünədək, əsasən, paytaxtdakı ixtisaslaşmış tibb müəssisələrində icrası mümkün olan bir sıra mürəkkəb əməliyyatlar, həmçinin tibbi müayinələr artıq region xəstəxanalarında da həyata keçirilir.