Heydər Əliyev Fondu artıq 20 ildir ki, “Talassemiyasız həyat naminə” proqram həyata keçirir. Birinci Vitse-Prezident Mehriban xanım Əliyevanın talassemiyalı insanların həyatını xilasetmə yönündə nəcib təşəbbüsü – könüllü qanvermə aksiyasına çağırışı bu gün də dəstəklənir. Bu proqram çərçivəsində Səhiyyə Nazirliyi Respublika Qan Bankının tibbi briqadası talassemiya xəstəliyindən əziyyət çəkənlərə yardım məqsədilə Salyan Rayon Mərkəzi Xəstəxanasında qanvermə aksiyası keçirib.

 

Xəstəxanadan Aztibb.az-a bildirilib ki, xeyirxah, humanist çağırışa qoşulan Salyan rayon sakinləri donorluq aksiyasında yaxından iştirak ediblər. Həkim-hematoloqlar tərəfindən hər bir donorla sorğu aparılıb, onun sağlamlığı öncədən yoxlanılıb, hərtərəfli tibbi müayinədən sonra onlardan qan götürülüb.

 

Ümumilikdə, bu nəcib aksiyada qan verib yaşatmaqla bir həyat qurtaran könüllü donor şəfqət, mərhəmət, humanizm, xeyirxahlıq və bu kimi yüksək insani keyfiyyətlər sərgiləyərək yaxından iştirak edib.

 

Qeyd edək ki, tədarük olunan qan komponentlərə ayrılaraq Mərkəzi Qan Bankının bazasına yerləşdiriləcək və talassemiyadan əziyyət çəkən insanların qanla təminatında istifadə olunacaq.