Yunanıstanda iqtisadi böhranın hiss olunmağa başladığı 2010-cu ildən bəri təxminən 20 min həkimin ölkəni tərk etdiyi bildirilir.

Bu barədə Aztibb.az medimagazin.com.tr-yə istinadla xəbər verir.

Yunan mətbuatında yer alan xəbərə görə, maaşların azlığı, həddindən artıq iş yükü, kadr çatışmazlığı və iqtisadi qeyri-müəyyənliklər səbəbindən bir çox həkim xaricə getməyə üstünlük verir.

Bildirilib ki, dövlət xəstəxanalarında çalışan gənc həkimlər ayda 1500 avrodan az maaş alır və həftədə 65 saatdan çox iş saatı ilə üzləşirlər.

Miqrasiya edən həkimlərin əksəriyyətinin 25-44 yaş arasında olan gənc mütəxəssislər olduğu və bu vəziyyətin səhiyyə xidmətlərinin keyfiyyətini aşağı salmaqla yanaşı, ölkənin məhsuldar əhalisinə də mənfi təsir göstərdiyi vurğulanıb.

Yunan həkimlərin ən çox üstünlük verdiyi ölkələr arasında İngiltərə, Almaniya, Fransa, Cənubi Kipr Rum Administrasiyası, Birləşmiş Ərəb Əmirlikləri və Səudiyyə Ərəbistanı olduğu bildirilib.