19 aprel 2025-ci il tarixində Çecenistan Respublikasının Qroznı şəhərində yerləşən kirayə mənzildə gecə saatlarında baş vermiş qaz partlayışı nəticəsində yanğın olub. Hadisə nəticəsində 61 yaşlı (kişi cinsli) şəxs ağır bədən yanığı xəsarətləri alıb. Xəsarət alan şəxsin bədəninin baş və üst tənəffüs yolları da daxil olmaqla ümumilikdə 50 faizi yanmışdır.
Zərərçəkən hadisədən təxminən 30 dəqiqə sonra Qroznı şəhərində yerləşən Kadırov adına Respublika Klinik Xəstəxanasının Yanıq şöbəsinin reanimasiya bölməsinə yerləşdirilərək, müvafiq müalicə alıb.
Respublika Təcili və Təxirəsalınmaz Tibbi Yardım Mərkəzindən Aztibb.az-a bildirilib ki, 23 may 2025-ci il tarixində, saat 18:35-də zərərçəkən ağır vəziyyətdə Rusiya-Azərbaycan sərhədinin neytral zonasından təcili tibbi yardım briqadası tərəfindən təhvil alınıb. Həmin gün saat 20:55-də xəstə bədənin, başın, boynun, yuxarı və aşağı ətrafların, habelə yuxarı tənəffüs yollarının 2-ci, 3-cü və 4-cü dərəcəli termiki yanığı diaqnozu ilə Yanıq Mərkəzinə təcili tibbi yardım briqadası tərəfindən çatdırılıb.
Təxliyə zamanı xəstəyə zəruri tibbi yardım göstərilmiş və hazırda o, ixtisaslaşdırılmış tibb müəssisəsində müalicəsini davam etdirir.
