Sumqayıtda “Ürək-damar risklərinin idarə olunması: Xroniki ürək çatışmazlığı və lipidlərə fokus” mövzusunda seminar keçirilib.

Seminarda Sumqayıt Tibb Mərkəzinin direktor müavini, tibb üzrə fəlsəfə doktoru Ramin Qasımov, 4 nömrəli Şəhər Xəstəxanasının baş həkimi Bahadır Mahmudov, 2 nömrəli Şəhər Xəstəxanasının Poliklinika şöbəsinin müdiri Şükür Əliyev, həmçinin tabeli müəssisələrdə çalışan kardioloq, endokrinoloq, reanimatoloq və terapevtlər iştirak ediblər.

Bu barədə Aztibb.az-a STM-dən xəbər verilib.

“Liv Bona Dea Hospital”ın invaziv kardioloqu Pərviz Cəfərov "Xroniki ürək çatışmazlığı – hökm deyil: YUPERIO ilə sabitliyə doğru", Bakı Sağlamlıq Mərkəzinin invaziv kardioloqu Fuad Səmədov isə “Yüksək/çox yüksək risq qrupu xəstələri: Hipolipidemik terapiyanın intensivləşdirilmə imkanları” mövzusunda təqdimatla çıxış ediblər.

Seminarda mövzu üzrə aktual sayılan risk faktorlarının idarə olunması, sağlam həyat tərzi, idman və psixoloji faktorların əhəmiyyəti vurğulanıb, həkimlərə ən son təlimatlara müvafiq xəstə müşayiəti strategiyası barədə biliklər aşılanıb.

Qarşılıqlı fikir mübadiləsi şəraitində keçən seminarın sonunda auditoriyanı maraqlandıran suallar cavablandırılıb.