Səhiyyə Nazirliyi Respublika QİÇS-lə Mübarizə Mərkəzinin əməkdaşları ölkəmizdə İİV-ə müayinələrin əhatə dairəsinin genişləndirilməsi, İİV infeksiyasının erkən mərhələdə aşkaralanması və İİV-lə bağlı məlumatlılıq səviyyəsinin yüksəldilməsi məqsədilə 12 inzibati ərazidə (Gədəbəy, Naftalan, Goranboy, Göygöl, Samux, Qazax, Axstafa, Tovuz, Şəmkir, Gəncə, Daşkəsən) yerləşən dövlət tibb müəssisələrinin rəhbərləri ilə görüşlər keçirib.

 

Bu barədə Aztibb.az-a Respublika QİÇS-lə Mübarizə Mərkəzindən məlumat verilib.

 

Bildirilib ki, görüşlərdə Mərkəzin direktor müavini Səbinə Babazadə, baş tibb qardaşı Məhəmməd Həsənov və Gəncə regional laboratoriyasının müdiri Ülkər Qurbanova iştirak ediblər.

 

Görüşlər zamanı İİV infeksiyası ilə bağlı mövcud epidemioloji vəziyyət haqqında geniş məlumat verilib, İİV-in aşkarlanmasında ilkin səhiyyə xidmətinin rolu barədə qarşılıqlı müzakirələr aparılıb, İİV-ə müayinələrin aparılmasının və erkən aşkarlanmanın vacibliyi vurğulanıb.

 

İİV infeksiyası ilə bağlı müayinə üçün toplanan qan nümunələrinin Mərkəz tərəfindən ayrılmış xüsusi nəqliyyat vasitəsilə nəqli üzrə şəraitin təşkili və praktik iş şərtlərinin müəyyən edilməsi, onların icrasına ciddi nəzarət edilməsinin vacibliyi müzakirə edilib.