İlkin səhiyyə xidməti üzrə pilot layihə çərçivəsində ağır və kritik vəziyyətdə olan xəstələrin ilkin ixtisaslı tibbi yardım zamanı düzgün çeşidlənməsi, adekvat tibbi yardımın göstərilməsi, eləcə də onların ixtisaslaşmış tibb müəssisələrinə təxliyə və daşınmasının səmərəli şəkildə təşkili məqsədilə təlimlər keçirilib.

Təlimçi qismində RTTTYM-in Sabunçu Təcili və Təxirəsalınmaz Tibbi Yardım Stansiyasının həkim-anestezioloq-reanimatoloqu Emil Xudulu və təcili tibbi yardım üzrə həkim Fikrət Şəfiyev çıxış ediblər.

RTTTYM-dan Aztibb.az-a bildirilib ki, təlimlərdə iştirakçı qismində Bərdə Rayon Mərkəzi Xəstəxanasının nəzdində fəaliyyət göstərən ailə sağlamlıq mərkəzləri və kənd həkim məntəqələrində çalışan ailə həkimləri iştirak ediblər. Ümumilikdə, 60 nəfər ailə həkimi təlimə cəlb olunub.

Təlimlərin əsas məqsədi pilot layihənin tələblərinə uyğun olaraq həkimlərin praktik bilik və bacarıqlarının artırılması, ilkin mərhələdə tibbi müdaxilələrin keyfiyyətinin yüksəldilməsi olub.

Təlim proqramı geniş mövzuları əhatə edib. Buraya ürək və tənəffüs dayanması zamanı təcili tibbi yardım, komatoz vəziyyətlər, kəskin zəhərlənmələr, toksikologiya əsasları, gürzə və gürzəkimilərin zəhərlənmələri, elektrik və ildırım zədələnmələri, günvurma, boğulma, epilepsiya, insult, infarkt, beyin və döş qəfəsi travmaları zamanı ilkin tibbi yardım, diferensial diaqnoz və həkim taktikası kimi mövzular daxil olub.