Azərbaycan Respublikası Dövlət Gömrük Komitəsinin Tibbi Xidmət İdarəsinin rəis müavini, tibb üzrə fəlsəfə doktoru, dosent İsmayıl Əfəndiyev Niderland Krallığının Maastricht Universiteti tərəfindən Avstriya Respublikasının Zalsburq şəhərində təşkil olunan “Səhiyyədə İqtisadi Qiymətləndirmələr” mövzusunda beynəlxalq seminarda iştirak edib.

 

Bu barədə Aztibb.az-a Mərkəzi Gömrük Hospitalından xəbər verilib.

 

Bildirilib ki, seminarda səhiyyə sistemində iqtisadi qiymətləndirmələrin və iqtisadi səmərəliliyin artırılması, göstərilən tibbi xidmətlərin xərc-effektivlik və xərc-fayda analizləri vasitəsilə təhlili, bu qiymətləndirmələr əsasında tibbi xidmətlərin keyfiyyətinin yüksəldilməsi, səhiyyə mütəxəssislərinin iqtisadi biliklərinin inkişafı və digər mühüm məsələlər müzakirə olunmuşdur. Tədbirdə 26 ölkədən səhiyyə sistemində rəhbər vəzifələrdə çalışan 38 nümayəndə təmsil olunub.

 

Dosent İsmayıl Əfəndiyev Mərkəzi Gömrük Hospitalında iqtisadi səmərəliliyin və pasiyent məmnuniyyətinin artırılması məqsədilə görülən işlər, tibbi xidmətlərin çeşidinin genişləndirilməsi, gündəlik tibbi təcrübədə beynəlxalq sübutlara əsaslanan protokolların tətbiqi, İcbari Tibbi Sığorta Agentliyi ilə əməkdaşlıq çərçivəsində səhiyyə xidmətlərinin iqtisadi prioritetləşdirilməsi, eləcə də qərarların formalaşdırılmasında xərc-effektivlik qiymətləndirilməsinin əsas vasitələrdən biri kimi qəbul edilməsi barədə seminar iştirakçılarına məlumat verib.

 

İsmayıl Əfəndiyevin çıxışı beynəlxalq ekspert auditoriyası tərəfindən böyük maraqla qarşılanıb. O, iştirakçılar tərəfindən verilən çoxsaylı sualları cavablandırıb.