Qəzza zolağındakı Fələstin Səhiyyə Nazirliyi bu günə qədər 1400-dən çox tibb işçisinin İsrailin hücumları nəticəsində həyatını itirdiyini açıqlayıb.

Aztibb.az bu barədə www.aa.com.tr-yə istinadla xəbər verir.

Nazirliyin Telegram hesabında verdiyi açıqlamaya görə, 1400-dən çox tibb işçisi şəhid olub. Təxminən 360 tibb işçisi hələ də İsrail həbsxanalarında saxlanılır: "İsrail 7 oktyabr 2023-cü ildə başlayan hücumlarında Qəzzadakı əksər xəstəxana və sağlamlıq mərkəzlərini hədəf alıb. Bu hücumlar Qəzzanın səhiyyə infrastrukturunun kütləvi şəkildə məhv edilməsinə, minlərlə xəstə və yaralının tibbi yardımdan məhrum olmasına səbəb olub. 

Yanvarın 19-da Qəzza zolağında qüvvəyə minən atəşkəsdən sonra İsrail ordusu martın 18-i səhər saatlarında şiddətli hücumlarını bərpa edib. İsrail ordusu yenidən hücumlara başladıqdan sonra əksəriyyəti qoca, qadın və uşaq olmaqla 1630 fələstinli həyatını itirib, 4302 nəfər isə yaralanıb".