Ölkə ərazisində müşahidə olunan qeyri-sabit hava şəraiti ilə əlaqədar olaraq Respublika Təcili və Təxirəsalınmaz Tibbi Yardım Mərkəzi gücləndirilmiş iş rejiminə keçib. Əhalinin sağlamlığının qorunması və vaxtında tibbi yardımın göstərilməsi məqsədilə fasiləsiz şəkildə xidmətlər davam etdirilir.

 

Mərkəzdən Aztibb.az-a bildirilib ki, paytaxtla yanaşı, bölgələrdə də təcili tibbi yardım briqadaları tərəfindən gücləndirilmiş rejimdə fəaliyyət göstərir. Çətin hava və yol şəraitinə baxmayaraq, bütün müraciətlərə çevik və operativ reaksiya verilir.

 

Belə ki, Siyəzən rayonunun Həmyə kəndi ərazisindən saat 11:30 radələrində daxil olan çağırış əsasında Siyəzən Təcili Tibbi Yardım Stansiyasının 3 briqadası hadisə yerinə cəlb olunub. Güclü yağış səbəbindən yaranan çətinliklər fonunda sel təhlükəsi ilə üzləşən təxminən 15-20 nəfərə yerindəcə ilkin tibbi yardım göstərilib. Həmin şəxslərdən yardıma ehtiyacı olanlar təxliyə edilərək Siyəzən Rayon Mərkəzi Xəstəxanasının Təcili tibbi yardım şöbəsinə yerləşdirilib.

 

Hazırda da bölgələrdə müvafiq istiqamətdə tədbirlər fasiləsiz davam etdirilir.