Azərbaycan Respublikası Prezidentinin Sərəncamına əsasən qəbul olunan “Naxçıvan Muxtar Respublikasının sosial-iqtisadi inkişafına dair 2023–2027-ci illər üçün Dövlət Proqramı”nın icrası istiqamətində əhalinin tibbi xidmətə əlçatanlığının artırılması və keyfiyyətli xidmətin göstərilməsi məqsədilə ardıcıl tədbirlər həyata keçirilir.
Naxçıvan Muxtar Respublikası Səhiyyə Nazirliyinin mətbuat xidmətindən Aztibb.az-a bildirilib ki, bu tədbirlər çərçivəsində muxtar respublikanın müxtəlif bölgələrində yaradılan Ailə sağlamlıq mərkəzlərində (ASM) çalışan tibbi personalın bilik və bacarıqlarının artırılması məqsədilə xüsusi təlimlər təşkil olunub.
İlkin olaraq Ordubad, Kəngərli və Sədərək rayonları üzrə ASM əməkdaşları təlimlərdə iştirak edib. Təlimlərdə əsas diqqət göstərilən tibbi xidmətin insan amilinə əsaslanmasına, həkim-pasiyent münasibətlərində etimadın və düzgün ünsiyyətin qurulmasına yönəldilib. Eyni zamanda, tibbi xidmətin keyfiyyətinin yüksəldilməsi, pasiyent məmnuniyyətinin təmin edilməsi və etik davranış qaydaları barədə iştirakçılara geniş məlumat verilib.
Ailə sağlamlıq mərkəzlərinin fəaliyyətində əsas hədəf tibb xidmətini əhalinin birbaşa yaşadığı ərazilərə yaxınlaşdırmaq, ilkin tibbi yardımı daha əlçatan və keyfiyyətli etməkdir. Keçirilən təlimlər bu hədəfə xidmət edir və tibbi personalın peşəkarlığının artırılmasına, vətəndaş məmnunluğunun daha da yüksəldilməsinə imkan yaradır.
Nəticə etibarilə, Naxçıvan Muxtar Respublikasında icra olunan Dövlət proqramı çərçivəsində yaradılan yeni səhiyyə infrastrukturu, həyata keçirilən təlimlər və tətbiq olunan yanaşmalar əhalinin sağlamlığının qorunması və tibbi xidmətin keyfiyyətinin artırılması istiqamətində mühüm addımdır.
