Fibromialgiya 3 aydan çox çəkən diffuz əzələ ağrıları və zəifliklə ortaya çıxan xroniki ağrı sindromudur.

Aztibb.az xəbər verir ki, əsas simptomu geniş yayılmış əzələ ağrılarıdır və bu, insanların gündəlik həyat keyfiyyətinin əhəmiyyətli dərəcədə azalmasına səbəb olur. Digər simptomlarına isə zəiflik, halsızlıq, yuxu pozğunluğu, iş vaxtının azalması, bağırsaq fəaliyyətinin pisləşməsi, səhər yuxudan yorğun oyanmaq və diqqət dağınıqlığı daxildir.

Fibromialgiyanın müalicəsi üçün dərman terapiyasına əlavə olaraq, məşq, masaj, fizioterapiya tətbiq edilir.

Bu xəstəliyin müalicəsində sağlam qidalanma, müntəzəm məşq və istirahət təsirli olur, lakin avtonom sinir sistemini tənzimləmək üçün fizioterapiya və reabilitasiya proqramlarına ehtiyac duyulur.

Adətən 20-40 yaş arasında meydana gələn bu xəstəlik qadınlarda kişilərə nisbətən 7 dəfə çoxdur. Həyatı dözülməz hala gətirən bu narahatlıqda bəzi xəstələr ağrıkəsicilər, masaj, yüngül məşqlər, akupunktur kimi müxtəlif müalicə üsulları ilə rahatlıq tapa bilərlər. 

Tədqiqatlar göstərir ki, ürək-damar məşqləri dayaq gücləndirici məşqlərlə birlikdə təkcə ümumi ağrıları aradan qaldırmır, həm də enerji səviyyəsini artırır, yuxunu yaxşılaşdırır və əhval-ruhiyyəni yüksəldir.