Ümumdünya Heyvan Sağlamlığı Təşkilatının (ÜHST) Nümayəndələri Assambleyasının Paris şəhərində keçirilən 91-ci Ali Baş Sessiyasında ölkəmizin xırdabuynuzlu heyvanların taun xəstəliyindən azad olması statusunun rəsmiləşdirilməsi elan olunub və Azərbaycan Respublikası Qida Təhlükəsizliyi Agentliyinin (AQTA) nümayəndə heyətinə bununla bağlı xüsusi sertifikat təqdim edilib.

 

Bu məlumat Aztibb.az-a AQTA-dan verilib.

 

Qeyd olunub ki, təşkilatın Elm Komissiyasının rəhbəri ölkəmizin ÜHST-nin prosedur qaydalarına uyğun təqdim edilən Hesabatına baxıldığını və xırdabuynuzlu heyvanların taun xəstəliyindən azad olması barədə tələblərə cavab verdiyini bildirib.

 

Daha sonra səsvermə yolu ilə hesabat təsdiq olunub. Beləliklə, təşkilat tərəfindən ölkəmizin xırdabuynuzlu heyvanların taun xəstəliyindən azad olması barədə statusunun rəsmiləşdirilməsi beynəlxalq səviyyədə elan olunub.

 

Sessiyada vurğulanıb ki, Azərbaycan regionda xırdabuynuzlu heyvanların taun xəstəliyindən azad olma statusu almış yeganə ölkədir. ÜHST-nin rəhbərliyi ölkəmizin bu sahədə təcrübəsinin digər ölkələrlə də bölüşdürüləcəyi və Azərbaycanın bu sahədə liderlik edəcəyini qeyd edib.