Respublika Təcili və Təxirəsalınmaz Tibbi Yardım Mərkəzinin direktoru Mirələm Calalov Mərkəzdə könüllülük fəaliyyəti ilə məşğul olan bir qrup gənclə görüşüb.

Mərkəzdən Aztibb.az-a verilən xəbərə görə, görüşdə müəssisənin direktoru bildirib ki, 2009-cu ildə Milli Məclisin qəbul etdiyi "Könüllü fəaliyyət haqqında” Qanun Azərbaycanda könüllülük fəaliyyətinin yeni inkişaf mərhələsində müsbət rol oynayıb və inkişafa təkan verib.

Gənclərin bilik və bacarıqlarını inkişaf etdirmək məqsədilə onların bütün sahələrdə inkişafına dəstək olmaq, öz ixtisasları üzrə praktik biliklərini inkişaf etdirməyin Mərkəzin əsas prioritetlərindən biri olduğunu bildirən M.Calalov təcili və təxirəsalınmaz tibbi yardım xidmətinin "vahid pəncərə" sistemi şəklində birləşdirilməsi prosesində səmərəli xidmətləri olan könüllülərə təşəkkür edib, onlara gələcək fəaliyyətlərində uğurlar arzulayıb.

Görüşdə insan resursları və maliyyə istiqamətləri üzrə təcrübə müddətini uğurla başa vuran Səbinə Həsənova və İlknur Murad bu müddət ərzində əldə etdikləri bilik və bacarıqlara görə təşəkkür ediblər. Qeyd ediblər ki, peşəkar mütəxəssislərlə birlikdə praktiki əməliyyatların icrasında sevə-sevə çalışıblar və real iş mühiti ilə yaxından tanış olublar.

Sonda könüllülük fəaliyyətində fərqlənən bir qrup gənc sertifikat və təşəkkürnamələrlə təltif edilib.